ސަގާފީ ތަރިކަ ރައްކާތެރިކުރާ ގައުމީ މަރުކަޒުން ބުނީ ރާއްޖޭގެ ސަގާފީ ތަރިކައިގެ ގާނޫނުގެ 26 ވަނަ މާއްދާގައި ބަޔާންކޮށްފައިވާ ގޮތަށް މައުނަވީ ސަގާފީ ތަރިކަ ދަފްތަރުކޮށް، ގިންތިކުރުމުގެ މަސައްކަތް އެ މަރުކަޒުން ފަށާފައިވާ ކަމަށެވެ.
އެގޮތުން ރަށްތަކުގައި ކުރަމުންދާ އެކިއެކި ދިވެހި ސަގާފަތާއި އާދަކާދަ އާއި ގުޅުން ހުރި މަސައްކަތްތަކާ ބެހޭ މައުލޫމާތު އެއްކޮށް، އެފަދަ މަސައްކަތްކުރާ މަސައްކަތްތެރީންނާއި އަދި ސަގާފީ ކުޅިވަރު ކުޅޭ ފަރާތްތަކާއި، ސަގާފަތް ދައްކުވައިދިނުމަށް އެކިއެކި މަސައްކަތް ކުރާ ފަރާތްތަކުގެ ދަފްތަރެއް އެކުލަވާލުމުގެ މަސައްކަތް ކުރަމުންދާ ކަމަށް އެ މަރުކަޒުން ވަނީ ބުނެފަ އެވެ.
އެ މަރުކަޒުން ބުނީ އެ މައުލޫމާތުތައް އެއްކޮށް، ދަފްތަރުކޮށް ބެލެހެއްޓުމާއި ދިވެހިރާއްޖޭގެ ސަގާފީ ތަރިކަ ރައްކާތެރިކޮށް އަދުގެ ޖީލަށާއި އަންނާން އޮތް ޖީލުތަކަށް ވާސިލުކޮށްދިނުމަކީ އެ މަރުކަޒާ އެކު ހުރިހާ ފަރުދުންގެ ޒިންމާއެއް ކަމަށެވެ.
ސަގާފީ މަސައްކަތްކުރާ މަސައްކަތްތެރީންނާއި އަދި ސަގާފީ ކުޅިވަރު ކުޅޭ މީހުންނާއި، ސަގާފަތް ދައްކުވައިދިނުމަށް އެކިއެކި މަސައްކަތް ކުރާ މީހުން މިމަހު 12ގެ ކުރިން އެ މަރުކަޒުގައި ރަޖިސްޓްރީ ވުމަށް ވަނީ އެދިފަ އެވެ. އަދި މައުލޫމާތު އެއްކުރުމަށް ތައްޔާރުކޮށްފައިވާ ފޯމު ފުރުމަށްފަހު މަރުކަޒަށް ފޮނުވުމަށް ވަނީ އެދިފަ އެވެ.
އެ މަރުކަޒުން ބުނީ އެ ފޯމު އީމެއިލް ވެސް ކުރެއްވިދާނެ ކަމަށެވެ. އަދި 7947266 އަށް ވައިބާ ނުވަތަ ވަޓްސްއެޕް މެދުވެރިކޮށްވެސް ފޮނުއްވިދާނެ ކަމަށް އެމަރުކަޒުން ވަނީ ބުނެފަ އެވެ.
