އެމްޑީޕީން މިދިޔަ ހަފްތާގައި ވަނީ އެ ޕާޓީގެ ކައުންސިލް ޕްރައިމަރީ އަންނަ މަހުގެ 30ގައި ބޭއްވުމަށް ނިންމާފައިވާކަން އިއުލާންކޮށްފަ އެވެ. ނަމަވެސް އެ އިއުލާން މިހާރު ވަނީ ބާތިލުކޮށްފަ އެވެ.
އެމްޑީޕީން މިއަދު ބުނީ އެ އިއުލާން ބާތިލުކުރީ އިލެކްޝަން ކޮމިޝަނުން ކައުންސިލް އިންތިޚާބަށް ކުރިމަތިލުމަށް އެދޭ ފޯމް ހުށަހެޅުމުގެ ތާރީޙް 17 ޖެނުއަރީ އިން 14 ދުވަހުގެ މުއްދަތަކަށް ހުޅުވާލާނެކަމަށް މައުލޫމާތު ދީފައިވާތީ ކަމަށެވެ.
މި ބަދަލާ ގުޅިގެން ޕާޓީގެ ޕްރައިމަރީ އޮންނާނީ އަންނަ މަހުގެ 16 ވަނަ ދުވަހުގެ 14:30 ން 20:00އަށް ކަމަށް އެމްޑީޕީން ބުންޏެވެ.
ލޯކަލް ކައުންސިލްތަކުގެ އިންތިހާބުގެ ފޯރިގަދަވަމުން އަންނައިރު މިހާރު އެމްޑީޕީގެ ޕްރައިމަރީގެ ކެމްޕެއިންގެ އެންމެ ފޯރިގަދަކޮށް ކުރިއަށް ގެންދަނީ މާލޭގެ މޭޔަރުގެ މަގާމަށް ވާދަކުރައްވާ ދެ ބޭފުޅުންގެ މެދުގަ އެވެ. މާލޭގެ މިހާރުގެ ވެސް މޭޔަރު އާދަމް އާޒިމާއި ރައްޔިތުންގެ މަޖިލިހުގެ މެދުހެންވޭރު ދާއިރާގެ ކުރީގެ މެމްބަރު އަލީ އާޒިމްގެ ކެމްޕެއިން މާލޭގައި ވަރަށް ގަދައަށް މިހާރު ވަނީ ފަށައިފަ އެވެ.
އެމްޑީޕީގެ ޕްރައިމަރީ ޖެނުއަރީ 30 ގައި ބާއްވާއިރު ސަރުކާރު ހިންގާ ޕާޓީ ޕީއެންސީގެ ޕްރައިމަރީ މި މަހުގެ 27 ގައި ބާއްވާނެ ކަން ވަނީ އިއުލާންކޮށްފަ އެވެ.
