ރޭ އާއްމުކޮށްފައިވާ އެ ވީޑިއޯއިން ފެންނަ ގޮތުގައި ގިނަ ބައެއްގެ އަތްދަށުވެ އަދި އަމިއްލަ ދިފާއުގައި މާބޮޑު ކަމެއް ނުކޮށް ހުރި އެ މީހާ ބިންމައްޗަށް ވައްޓާލުމަށްފަހު ބިންމަތީގައި ދަމައި، އޭނާގެ އަތްމައްޗަށް ސޭފްޓީ ބޫޓަކުން އަރައި އަދި ތަޅައި އަނިޔާ ކުރުމަށްފަހު މޫދަށް އެއްލާލަ އެވެ.
އެޗްއާރުސީއެމުން ބުނީ، ޝަރުއީ ހަމަތަކުގެ މަތިން ކުށް ސާބިތުނުވާހާ ހިނދަކު ކޮންމެ މީހަކީ ވެސް ކުށެއް ނެތް މީހެއް ކަމަށް ބެލުމަކީ އިސްލާމީ ޝަރީއަތާއި ގާނޫނުއަސާސީން ކަށަވަރުކޮށްދޭ ހައްގެއް ކަމަށެވެ.
އެޗްއާރުސީއެމުން ބުނީ ޖިނާއީ ނުވަތަ މަދަނީ ވިޔަސް މައްސަލަތަކުގައި ސުލްހަ އިސްކުރުމާ އެކު ގާނޫނީ އިމުގެ ތެރެއިން ހައްލު ހޯދަން އިލްތިމާސްކުރާ ކަމަށެވެ.
އެ މައްސަލަ ފުލުހުންނަށް ހުށަހަޅާފައި ނުވިޔަސް، ފުލުހުންގެ ސަމާލުކަމަށް އައުމުން އެކަން ބަލަމުން އަންނަ އެ އިދާރާ އިން ބުނެފައިވެ އެވެ. މީގެކުރިން ވެސް ވައްކަމުގެ ތުހުމަތުވި މީހުންނަށް އަނިޔާ ކުރުމުގެ މައްސަލަތައް ފެންމަތިވެފައިވެ އެވެ.
