ކަސްޓަމްސްއިން ކުރި އިއުލާނެއްގައި ބުނީ ވައިގެ މަގުން އަންނަ މުދާ ކްލިއާ ކުރުމަށް ކަސްޓަމުން ދޭން ޖެހޭ ހުރިހާ ހިދުމަތް 24 ގަޑިއިރަށް ބަދަލުކޮށްފައިވާ ކަމަށެވެ.
މި ބަދަލު ގެނައި ކުދި އަދި މެދުފަންތީގެ ވިޔަފާރިވެރިންނާ އެކު ރައީސް ޑރ. މުހައްމަދު މުއިއްޒު ބޭއްވި ބައްދަލުވުމުގައި ވިޔަފާރިވެރިއަކު ހިއްސާކުރި ކަންބޮޑުވުމަކާ ގުޅިގެންނެވެ.
މާލޭ ވިޔަފާރި ބަނދަރުން، އަމިއްލަ ފަރާތްތަކުގެ ވެހިކަލް ވައްދައިގެން މުދާ ކްލިއާ ކުރެވޭނެ އިންތިޒާމު ހަމަޖައްސައިދެއްވާނެ ކަމަށާއި، ކުރިން ރުފިޔާއިން ދައްކަންޖެހޭ ބައެއް ފީތަކަށް ވެސް ގެނެވެން އޮތް ހައްލު ހޯއްދަވައިދެއްވާނެ ކަމަށް ރައީސް ވަނީ ވިދާޅުވެފަ އެވެ.
ރައީސްގެ ބައްދަލުވުމުގައި އެ ކަންބޮޑުވުން ހިއްސާކުރެއްވި، ރާއްޖޭގައި ފުޅާ ދާއިރާއެއްގައި ކުރިއާގެ ހިދުމަތް ދޭ ސީޕެކްސްގެ ޖެނެރަލް މެނޭޖަރު ހުސެން ވަނީ ކަސްޓަމްސްގެ ހިދުމަތް 24 ގަޑިއިރަށް ބަދަލުކޮށް ވިޔަފާރިވެރިންނަށް ކުރިމަތިވަމުން އަންނަ ދަތިތައް ހައްލުކޮށްދެއްވުމަށް އެކިފަހަރު މަތިން ކަސްޓަމްސްގައި އެދިފައިވާކަމަށް ވިދާޅުވެފަ އެވެ.
ރައީސް ވަނީ ވިޔަފާރިތަކަށް ފަސޭހަ ކުރުމަށްޓަކައި އެއާޕޯޓާއި ސީޕޯޓްގައި ހުރި ދަތިތައް ހައްލުކޮށް ދެއްވާނެކަމުގެ ޔަގީންކަން ދެއްވައިފަ އެވެ.
