މުހިންމު ބައެއް ބޭސްތައް ރާއްޖެއިން ލިބުން ދަތިވެ، ބޮޑު އަގުގައި ގަންނަން ޖެހޭ މައްސަލަ ބޮޑުވެފައިވާއިރު، ރައީސް ޑރ. މުހައްމަދު މުއިއްޒު ރައްޔިތުންނާ ބައްދަލުކުރެއްވިއިރުވެސް އާންމުން އެންމެ ގިނައިން ކުރި އެއް ޝަކުވާއަކީ އެކީއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ އެ މައްސަލައަށް 100 ޕަސެންޓް ހައްލު ލިބޭނެ ދުވަހެއް ނޭންގުނު ނަމަވެސް، މައްސަލަ ހައްލުކުރަން ގިނަ ފިޔަވަޅުތަކެއް އަޅައި، މިހާރުވެސް ބޮޑެތި ލުއިތަކެއް ލިބެމުންދާ ކަމަށެވެ.
ނާޒިމް ވިދާޅުވީ ބޭހުގެ މައްސަލަ ހައްލު ކުރުމަށް ސަޕްލައިގެ އިތުރުން އާސަންދަ ނިޒާމާއި އެޑްމިނިސްޓްރޭޓިވް ޕްރޮސެސްގެ ތެރެއިން ރަނގަޅު ކުރަން ޖެހޭ ކަންކަން ކުރާމުންދާ ކަމަށެވެ.
ބޭސް އެތެރެކުރުމުގެ އިތުރުން، އުސޫލުތައް ހަރުދަނާކުރުމުގެ ގޮތުން މިދިޔަ އަހަރު މުޅިން އަލަށް 40 ޓްރީޓްމަންޓް ގައިޑްލައިން އެކުލަވާލާފައިވާ ކަމަށާއި މި ގައިޑްލައިންތަކުގެ ސަބަބުން ޑޮކްޓަރުންނާއި ބަލިމީހުންނަށް އެންމެ އެކަށޭނެ ބޭސްތައް ކަނޑައެޅުމުގައި ފަސޭހަވެގެންދާނެ ކަމަށްވެސް މިނިސްޓަރު ވިދާޅުވި އެވެ.
ރާއްޖެއަށް ބޭސް އެތެރެކުރުމުގެ ނިޒާމު އިތުރަށް ހަރުދަނާކުރުމަށްޓަކައި، "ސްޓޭޓް ފާމަސޫޓިކަލް އެންޑް މެޑިކަލް ސަޕްލައި" ގެ ނަމުގައި މިދިޔަ އަހަރުގެ ސެޕްޓެމްބަރު 9 ގައި ސަރުކާރުން ވަނީ ހާއްސަ ކުންފުންޏެއްވެސް އުފައްދާފަ އެވެ.
ބޭސް ނުލިބޭ މައްސަލަ ބޮޑުވެ، އާންމުން ޝަކުވާ ކުރަމުންދާތާ ދުވަސްތަކެއް ވެފައިވާއިރު، ސަރުކާރުން ބުނަމުން އަންނަނީ އެކި ނިޒާމުތައް ތައާރަފު ކޮށްގެން ވެސް މައްސަލަ ހައްލު ކުރަން މަސައްކަތް ކުރާ ކަމަށެވެ. ބޭސް އެތެރެކުރަން ހާއްސަ ކުންފުންޏެއް އުފެއްދީ ވެސް އޭގެ ތެރެއިންނެވެ.
