ބައްސާމްގެ މައްޗަށް ސާބިތުވި މި މައްސަލައަކީ ފީފާއިން އެފްއޭއެމްއަށް ފޮނުވި 1.2 މިލިއަން ޑޮލަރު (18 މިލިއަނަށް ވުރެ ގިނަ ރުފިޔާ) އަށް ހިޔާނާތްތެރިވެ، އެ ފައިސާ ލޯންޑާކޮށްގެން ހުޅުމާލޭގެ އަމީން އެވެނިއުއިން ޕެންޓްހައުސްއެއް ގަތް މައްސަލައެވެ.
މި މައްސަލާގައި ހިޔާނާތާއި މަނީ ލޯންޑްރިންގެ އިތުރު ދައުވާތަކެއް ބައްސާމްގެ މައްޗަށް ވަނީ އުފުލާފަ އެވެ. މި މައްސަލައިގައި ބައްސާމް ގަނެފައިވާ ޕެންޓްހައުސް ފުލުހުން ވަނީ ހިފަހައްޓާފަ އެވެ.
މި މައްސަލައިގައި ބައްސާމްގެ މައްޗަށް އެ ދެ ދައުވާ ސާބިތުވާކަމަށް ގާޒީ މުހައްމަދު މިސްބާހް ވަނީ ނިންމަވާފައެވެ. މިއަދު އޮންނާނީ އަދަބު ކަނޑައެޅުމެވެ. މި މައްސަލާގައި ދެން ދައުވާކުރާ މީހުންނާ މެދު އަދި ގޮތެއް ނުނިންމަ އެވެ.
އޭގެ ތެރެއިން ހަސަން ވަހީދު ވަކީލަކު ނެތުމުން، ވަކީލަކާއެކު ހުލާސާ ބަޔާން އިއްވުން މިއަދު އޮންނާނެ އެވެ. ދެން ދައުވާކުރާ އަގީލާއި އަމިން ކޮންސްޓްރަކްޝަންގެ ބައި ވެސް މިއަދު އޮންނާނެ އެވެ.
ބައްސާމް މިހާރުވެސް ހުރީ ޖަލުގަ އެވެ. އެއީ، އެފްއޭއެމްގެ ފައިސާއަށް ހިޔާނަތްތެރިވެގެން އިއްވާފައިވާ ހަތަރު އަހަރުގެ ހުކުމަކާއި، މަނީ ލޯންޑްރިންގެ މައްސަލައިގައި އިއްވާފައިވާ ފަސް އަހަރުގެ ހުކުމަކާއެކު ޖުމްލަ ނުވަ އަހަރުގެ ހުކުމް ތަންފީޒު ކުރުމަށެވެ.
