ޕީއެންސީގެ އޮފީސް ހުޅުވުމަށް މިރޭ ބޭއްވި ޖަލްސާގައި ރައީސް ވިދާޅުވީ އޭޕްރީލްމަހުގެ 4 ވަނަ ދުވަހު އޮންނަ ލޯކަލް ކައުންސިލް އިންތިހާބަކީ ވަރަށް މުހިއްމު އިންތިހާބެއްކަމަށެވެ. އެގޮތުން ރައްޔިތުންނަށް އެމަނިކުފާނު ވެވަޑައިގެންފައިވާ ހުރިހާ ވައުދެއް ފުއްދެވުމަށް ރަށު ފެންވަރުގައި އަދި ސިޓީ ފެންވަރުގައިވެސް އެއްްބާރުުލުން ދޭނެ ކެނޑިޑޭޓުން އިންތިހާބުކުރުން މުހިއްމުކަމަށްވެސް ރައީސް ވިދާޅުވި އެވެ.
އެމަނިކުފާނު ވިދާޅުވީ، ސަރުކާރު ޖަވާބުދާރީ ކުރުމުގެ ވާހަކަ އެއްވެސް ބަޔަކު ކެމްޕެއިނުގައި ދައްކާ ނަމަ އެއީ ގޯސް ސިގުނަލެއް ކަމަށެވެ.
ރައީސްގެ ވާހަކަފުޅުގައި ވަނީ އެމަނިކުފާނުގެ ސަރުކާރުން މިދިޔަ ދެ އަހަރެއްހާ ދުވަހުގެ ކުރެއްވި މަސައްކަތާއި ހާސިލުކޮށްފައިވާ ކާމިޔާބީއަށްވެސް އަލިއަޅުއްވާލައްވާފަ އެވެ. އަދި މަޖިލިސް ހުޅުވުމުގެ ގޮތުން އިއްވަވާ ރިޔާސީ ބަޔާނުގައި އެކަންކަމާއި ގުޅޭ ތަފްސީލްތަކާއި ކުރިއަށް ރޭވިފައިހުރި މުހިއްމު ކަންކަމުގެ މައްޗަށްވެސް އަލިއަޅުއްވާލައްވާނެކަމަށް ރައީސް ވިދާޅުވި އެވެ.
