ކަމާބެހޭ އިދާރާތަކުން ނެރުނު ރިޕޯޓުތައް ބުނާ ގޮތުގައި ފާއިތުވި 12 ގަޑިއިރު ތެރޭގައި އެ ސަރަހައްދަށް ވަނީ ނުވަ ފަހަރެއްގެ މަތިން ބިންހެލުން އައިސްފައެވެ. މައިގަނޑު ގޮތެއްގައި މި ލޮޅުންތައް އައިސްފައިވަނީ ގުޖުރާތުގެ ސައުރަޝްތުރާ ސަރަހައްދުގައި އޮންނަ އަމްރެލީ ޑިސްޓްރިކްޓަށެވެ.
އޮފިޝަލުން ހާމަކުރި ގޮތުގައި މި ބިންހެލުންތައް އަންނަން ފަށާފައިވަނީ ރޭގަނޑު މެންދަމުގެ ވަގުތެއްގައެވެ. މި ސިލްސިލާ ލޮޅުންތަކުގެ ތެރެއިން އެންމެ ބާރުގަދަ ބިންހެލުމެއްގެ ގޮތުގައި ރެކޯޑު ކުރެވިފައިވަނީ 3.3 މެގްނިޓިއުޑްގެ ބިންހެލުމެކެވެ. މީގެ އިތުރުން 3.1 ގެ ބިންހެލުމެއްވެސް ރެކޯޑުކުރެވުނުއިރު، ދެން އައިސްފައިވާ ހުރިހާ ލޮޅުމެއްގެ ބާރުމިން ހުރީ 3 ޑިގްރީއަށްވުރެ ދަށުގައި ކަމަށް އެ ގައުމުގެ ބިންހެލުމާ ބެހޭ ދިރާސާކުރާ އިދާރާތަކުން ބުންޏެވެ.
އާންމުކޮށް މިފަދަ ހާލަތްތައް ދިމާވަނީ މޫސުމީ ގޮތުން ނުވަތަ ބިމުގެ އަޑިއަށް އަންނަ ޓެކްޓޮނިކް ބަދަލުތަކާ ގުޅިގެންނެވެ. އެހެންކަމުން މިއީ މާ ނުރައްކާތެރި ހާލަތެއް ނޫންކަމަށް އޭނާ ފާހަގަކުރެއްވިއެވެ.
ކުއްލިއަކަށް ގިނަ ބިންހެލުންތަކެއް އަންނަން ފެށުމުން، އަމްރެލީގެ ރަށްތަކުގައި ދިރިއުޅޭ ރައްޔިތުން ވަނީ ބިރުން ގެތަކުން ނުކުމެ މަގުމައްޗަށް އެއްވެފައެވެ. ގިނަ ބަޔަކު ރޭގަނޑުގެ ނިދި ނަގާލައި މަގުމަތީގައި ތިބިއިރު، އެމީހުންގެ ކަންބޮޑުވުންތައް ސޯޝަލް މީޑިއާ މެދުވެރިކޮށް ވަނީ ހިއްސާކޮށްފައެވެ. ނަމަވެސް އެއްވެސް މީހަކަށް އަނިޔާއެއް ލިބުނު ކަމުގެ ނުވަތަ އިމާރާތަކަށް ގެއްލުން ލިބުނުކަމުގެ ރިޕޯޓެއް އަދި ކޮށްފައެއް ނުވެއެވެ.
ގުޖުރާތަކީ ތާރީހީ ގޮތުން ބިންހެލުމުގެ ނުރައްކާ ބޮޑު ސަރަހައްދެއްގެ ގޮތުގައި ފާހަގަކުރެވިފައިވާ ތަނެކެވެ. މީގެ ކުރިން 2001 ވަނަ އަހަރު ގުޖުރާތުގެ ކަޗް ސަރަހައްދަށް އައި ވަރުގަދަ ބިންހެލުމުގައި އެތައް ހާސް ބަޔަކު މަރުވެ ބޮޑެތި ގެއްލުންތަކެއް ލިބިފައިވާތީ، ކުދި ބިންހެލުންތައް އައުމުން ވެސް އާންމުންގެ މެދުގައި އަބަދުވެސް ބިރުވެރިކަން އުފެދެއެވެ.
