މޫނުގެ އުޖާލާކަން ދަމަހައްޓައި، ޒުވާންކަން ދެއްކުމަށްޓަކައި އެކި ކަހަލަ އަގުބޮޑު ކްރީމްތަކާއި ފަރުވާތައް ހޯދުމަށް ގިނަ ބަޔަކު ބޮޑު ހަރަދެއް ކުރެއެވެ.
ނަމަވެސް، މޫނުގެ ރީތިކަމާއި ގުޅިފައިވާ އެންމެ މުހިންމު އެއް ކަމަކީ ރަނގަޅަށް ނިދުން ކަމުގައި ސިއްހީ މާހިރުން ބުނެއެވެ. މިއީ "ބިއުޓީ ސްލީޕް" ގެ ގޮތުގައި މަޝްހޫރުވެފައިވާ ހަގީގަތެކެވެ.
ނިދި މަދުވުމުގެ ސަބަބުން ހަށިގަނޑުގައި ސްޓްރެސް ހޯމޯން ނުވަތަ "ކޯޓިސޯލް" ލެވެލް މަތިވެގެން ދެއެވެ. މި ހޯމޯންގެ ސަބަބުން ހަމުގެ އޮމާންކަމާއި ވާންކަން ހިފަހައްޓައިދޭ މައިގަނޑު މާއްދާ ކަމަށްވާ "ކޮލާޖަން" ހަލާކުކޮށްލައެވެ. ނަތީޖާއެއްގެ ގޮތުން މޫނުގައި ރޫޖެހުމާއި، ހަންގަނޑު ދޫވުން ފަދަ ކަންކަން އަވަހަށް މެދުވެރިވެއެވެ. އެހެންކަމުން ނިދި ހަމަކުރުމަކީ ޒުވާންކަން ދެމެހެއްޓުމަށް ކޮންމެހެން ބޭނުން ކަމެކެވެ.
މީގެ އިތުރުން، އެކަށީގެންވާ ވަރަށް ނިދި ނުލިބޭނަމަ ލޯ ކައިރި ކަޅުވުމާއި ލޯ ދުޅަވުން ފަދަ މައްސަލަތައް ކުރިމަތިވެއެވެ. މިއީ މީހާގެ ސިފަ ބަލިކަށިކޮށްދައްކައި، ވަރުބަލިވެފައިވާ ކަމުގެ އިހުސާސް ގެނުވާ ކަންކަމެވެ. ރަނގަޅަށް ނިދުމުން ހަށިގަނޑުގެ ލޭ ދައުރުވުން ރަނގަޅުވެ، މޫނުގެ ކުލަ އަލިވެ، ތާޒާކަން ގެނެސްދެއެވެ. ހަންގަނޑުގެ ކުލަ އެއްވަަރެއްގައި ހިފެހެއްޓުމަށްވެސް ނިދި މުހިންމު ދައުރެއް އަދާކުރެއެވެ.
ރޭގަނޑުގެ ނިދީގެ ވަގުތަކީ ހަށިގަނޑު އަމިއްލައަށް މަރާމާތުވާ ވަގުތެވެ. ގުދުރަތީ ގޮތުން އުފައްދާ ގްރޯތް ހޯމޯންތައް އިތުރުވެ، ދުވާލުގެ ވަގުތުތަކުގައި އިރުގެ އަވިންނާއި މާހައުލުގެ ނުސާފުކަމުން ހަމަށް ލިބިފައިވާ ގެއްލުންތައް ރަނގަޅުކޮށްދެނީ ގަދަ ނިދީގައި އޮންނަ ވަގުތުގައެވެ.
ކަމާބެހޭ މާހިރުން ލަފާދޭ ގޮތުގައި ބޮޑެތި މީހުން ރޭގަނޑު މަދުވެގެން 7 ގަޑިއިރާއި 9 ގަޑިއިރާ ދެމެދުގެ ވަގުތެއްގައި ނިދަން ޖެހެއެވެ. ނަލަވާން ބޭނުންނަމަ، ބޭރުފުށުގެ ފަރުވާތަކަށްވުރެ ބޮޑަށް ހަށިގަނޑަށް ބޭނުންވާ އަރާމާއި ނިދި ހޯދުމަށް އިސްކަންދިނުމަކީ އެންމެ ރަނގަޅު ގޮތެވެ.
