ދައުލަތުގެ މީޑިއާގައި ވާހަކަދައްކަވަމުން އެންޑީއޭގެ ޗެއާޕާސަން އަދި ހޯމް މިނިސްޓްރީގެ ސްޓޭޓް މިނިސްޓަރު އަހްމަދު ސިއްދީގު ވިދާޅުވީ ކަމާގުޅޭ އިދާރާތަކުން އެކުލަވާލާފައިވާ ރިޕޯޓްތަކާއި ތަފާސްހިސާބުތަކުން އެނގޭ ގޮތުގައި 10،000 އެއްހާ މީހުން މަސްތުގެ ވަބާގައި ޖެހިފައިވާ ކަމަށެވެ.
ސިއްދީގު ވިދާޅުވި ގޮތުގައި އާބާދީގެ ނިސްބަތުން ރާއްޖޭގައި މަސްތުވާތަކެތީގެ ވަބާގައި ޖެހިފައިވަނީ ބޮޑު އާބާދީއެއް ކަމަށެވެ. އެކަމުގެ ތެރޭގައި ޒުވާނުންގެ އިތުރުން ދޮށީ އުމުރުގެ މީހުންވެސް ބައިވެރިވާ ކަމަށް ވިދާޅުވެ ސިއްދީގު ވަނީ ކަންބޮޑުވުން ފާޅުކުރައްވާފަ އެވެ.
ސިއްދީގު ވިދާޅުވީ ރާއްޖެއަކީ 95 އިންސައްތަ ކަނޑުގެ ސަރަހައްދު ހިމެނޭ ގައުމަކަށް ވުމުން، މިފަދަ ތަކެތި އެތެރެކޮށް އެކި ހިސާބުތަކަށް އުފުލުމަކީ އެކަންކަން ކުރާ ފަރާތްތަކަށް އެހެން ގައުމުތަކަށްވުރެ ފަސޭހަ ކަމަކަށް ވެފައި އޮވެދާނެ ކަމަށެވެ. ނަމަވެސް، ކަމާބެހޭ ފަރާތްތަކުން ވަރަށް ބޮޑު އިސްކަމެއް ދީގެން، ބޮޑެތި ހޭދަތަކެއް ކޮށްގެން މިކަން ހުއްޓުވުމަށް ބުރަ މަސައްކަތްތަކެއް ކުރަމުންދާ ކަމަށްވެސް ވިދާޅުވި އެވެ.
މީގެއިތުރުން ޑްރަގު ބޭނުންކުރާ ހުރިހާ އެންމެން އެއްފަހަރާ މާލެ ގެނެސްގެން ފަރުވާ ދިނުމަކީ ދައުލަތަށް ކުރިމަތިވެފައިވާ ބޮޑު ގޮންޖެހުމެއް ކަމަށާއި އަދި މިހާރު ހުރި ނޭޝަނަލް ޑްރަގް އެޖެންސީގެ ފެސިލިޓީތައް ބޭނުންކޮށްގެން އެންމެންނަށް ފަރުވާ ދިނުމުގައި ދަތިތަކެއް ހުރި ނަމަވެސް، އެ ފަރާތްތަކަށް ފަރުވާ ދިނުމުގެ ނިޒާމު ހަރުދަނާކުރުމަށް ސަރުކާރުން މަސައްކަތް ކުރަމުންދާ ކަމަށްވެސް ވިދާޅުވި އެވެ.
އެންޑިއޭގެ އާ ޗެއާމަން ސިއްދީގު ވިދާޅުވީ، މަސްތުވާތަކެތީގެ މައްސަލަ ހައްލު ކުރުމުގައި މި 2026 އަހަރު އުފާވެރި މަންޒަރުތަކެއް ފެންނާނެ ކަމަށެވެ.
މިވަގުތު ރާއްޖޭގެ 9 ސަރަޙައްދެއްގައި ޑްރަގް ރިހެބިލިޓޭޝަން ސެންޓަރު އަންނަނީ ހިންގަމުންނެވެ. މިދިޔަ އަހަރު ފަހުކޮޅު ރައީސް އަތޮޅުތަކަށް ކުރެއްވި ދަތުރުފުޅުގައި ވަނީ ނ.ވެލިދޫ އަދި ލ.އަތޮޅުގައިވެސް ރިހެބް ސެންޓަރެއް ގާއިމުކުރުމުގެ މަސައްކަތް ފަށާފަ އެވެ.
މަސްތުވާތަކެއްޗާ ދެކޮޅަށް ރައީސްގެ އިރުޝާދުގެ ދަށުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ފުލުހުން ވަނީ ހާއްސަ އޮޕަރޭޝަނެއް ކުރިޔަށް ގެންގޮސް ރާއްޖޭގެ އެކި ކަންކޮޅުތަކުގައި މަސްތުވާތަކެތީގެ ވިޔަފާރިކުރަމުން އަންނަ ބޮޑުން ހައްޔަރުކޮށްފަ އެވެ.
