މާލޭގެ މޭޔަރު ކަމަށް ވާދަކުރެއްވުމަށް އިދިކޮޅު އެމްޑީޕީގެ ޓިކެޓަށް ވާދަކުރައްވާ އަލީ އާޒިމް މީގެ ދެދުވަސް ކުރިން ނޫހަކަށް ދެއްވި އިންޓަވިއުއެއްގައި ވިދާޅުވީ މުއިއްޒުގެ މޭޔަރުކަމުގައި މާލެއިން ނުއަގުގައި ދިނުމުން ދިނުމުން ލިބުނު ގެއްލުމުގެ ބަދަލު ހޯދަން ކޯޓަށް ވަޑައިގަންނަވާނެ ކަމަށެވެ.
އާޒިމް ވިދާޅުވީ މާލެ ސިޓީން ނުއަގުގައި ދީފައި ހުރި ބިންތަކުގެ މައްސަލަ ހައްލުކުރަން ބިންތައް ދީފައި ތިބި މީހުންނާ ވާހަކަ ދައްކާނެ ކަމަށާއި ވާހަކަ ދައްކައިގެން ވެސް ހައްލުވާނަމަ ކޯޓަށް ގޮސްގެން އެ ބިންތަކުގެ އެއްބަސްވުންތައް ބާތިލުކޮށް އަތުލާނެ ކަމަށެވެ.
ސިޓީ ކައުންސިލަށް ލިބުނު ގެއްލުމުގެ ބަދަލު ހޯދަން މޭޔަރު ކަމަށް އިންތިހާބުވާ ފުރަތަމަ ހަ މަސް ދުވަހުގެ ތެރޭގައި ލޯޔަރުންގެ ޓީމެއް އެކުލަވާލައި އެ މައްސަލަތައް ކޯޓަށް ވައްދަން ފަށާނެ ކަމަށް އާޒިމް ވިދާޅުވި އެވެ.
އާޒިމްގެ އެ ވާހަކައަށް ރައްދު ދެއްވައި، އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޑރ. މުއިއްޒު މާލޭގެ މޭޔަރުކަމުގައި ހޭދަކުރެއްވި 2 އަހަރާއި 6 މަސްދުވަހުގެ ތެރޭގައި، މާލެ ސިޓީގެ އެއްވެސް ބިމެއް ބަޔަކަށް ވިއްކަވާފައެއް ނުވާކަމަށެވެ. އަދި ނުގަވާއިދުން އެއްވެސް ފަރާތަކަށް ބިމެއް ކުއްޔަށް ދެއްވާފައިނުވާކަން ކައުންސިލްގެ ރެކޯޑުތަކުން ސާފުކޮށް ފެންނަން އޮތް ކަމަށް އޭނާ ފާހަގަކުރެއްވި އެވެ.
އޭނާ ތުހުމަތު ކުރެއްވި ގޮތުގައި ބިންތައް ދޫކުރި ގޮތުން ލިބުނު ގެއްލުމުގެ ބަދަލު ހޯދަން ކޯޓަށް ދާ ވާހަކަ އަކީ ހަގީގަތްތައް ހަޖަމު ނުކުރެވިގެން ދައްކާ ވާހަކަ އެކެވެ.
މިދިޔަ އަހަރުގެ ނޮވެމްބަރު މަހު މާލެ ސިޓީ ކައުންސިލުން ހާމަކޮށްފައިވާ ގޮތުގައި މާލެ އާއި ވިލިމާލެއިން ޖުމްލަ 157 ބިން ކައުންސިލުން ވަނީ ކުއްޔަށް ދީފަ އެވެ. އޭގެ ތެރެއިން 40 ޕަސަންޓް ބިން ކުއްޔަށް ދީފައިވަނީ މިހާރުގެ ރައީސް މުހައްމަދު މުއިއްޒުގެ މޭޔަރު ކަމުގަ އެވެ.
