މިފްކޯއަށް ބޮޑުކަންނެލި ގަތުމަށް ވާންޖެހޭ އެންމެހާ ތައްޔާރީތައް ނިންމައި، ކަނޑުއޮތްގިރި އޮޕަރޭޝަނަށް ގެނެސް މިހާރު ވަނީ ރަސްމީކޮށް ކަންނެލި ގަންނަން ފަށާފަ އެވެ.
މި މަސައްކަތް ފަށާފައި މިވަނީ ބޮޑުކަންނެލީގެ މަސްވެރިންނަށް ދިމާވެފައިވާ ގޮންޖެހުންތަކަށް ހައްލެއް ހޯދައިދިނުމަށް ސަރުކާރުން ކުރައްވާ މަސައްކަތްތަކުގެ ތެރޭގައި ހިމަނައިގެންނެވެ.
މިކަމާއި ގުޅިގެން ބީކޭއެމްޔޫ އިން މިއަދު ސޯޝަލް މީޑިއާގައި ކުރި ޕޯސްޓެއްގައި ބުނީ ކުދި އަދި ރިޖެކްޓު ކަންނެލި މިފްކޯ އަށް ގަތުމަކީ ރަނގަޅު ފެށުމަކަށް ވިއަސް މަޝްވަރާކުރި އަގުގައި ރިޔާސީ ވައުދާ އެއްގޮތަށް މިފްކޯއަށް ބޮޑު ކަންނެލި ވީހާ ވެސް އަވަހަކަށް ގަންނަން ފެށުމަށް ވެސް ގޮވައިލި އެވެ.
ބޮޑު ކަންނެލި މަސްވެރިން މައިގަނޑު ގޮތެއްގައި އެދެނީ ސަރުކާރުގެ މަސްކުންފުނި މިފްކޯއަށް ބޮޑު ކަންނެލި ގަންނަން ފެށުމަށާއި، ކަންނެލި ގަނެވޭނެ އެންމެ ދަށް އަގަކީ 80 ރުފިޔާ އަދި 100 ރުފިޔާ ކަމަށް ހެދުމަށާއި، މަސްވެރިންނަށް ބޭސް ރޭޓުގައި ތެޔޮ ފޯރުކޮށްދިނުމަށާއި، ފަސޭހައިން އައިސް ލިބޭނޭ އިންތިޒާމު ހަމަޖެއްސުމަށެވެ.
