ޓީޓީއެމް އިން ބުނީ ޖޫން މަހު ރާއްޖޭގެ "ވާޗުއަލް ޓުއާއެއް" ހަމަޖެހިފައި ވާކަމަށެވެ. އަދި މިއީ ރާއްޖޭގެ ޓޫރިޒަމް މާކެޓް ކުރުމަށް ކުރެވޭ މުޅިން އާ ކަމެއް ކަމަށް ޓީޓީއެމް އިން ފާހަގަ ކުރެއެވެ.
މިކަމުގެ ސަބަބުން ރާއްޖޭގެ ފަތުރުވެރިކަން އިޝްތިހާރު ކުރުމަށް މުސްތަގުބަލުގައި ކުރިއަށް ގެންދަން ފަސޭހަވާނެ ކަމަށް ވެސް ޓީޓީއެމް އިން ބުނެއެވެ.
ޓީޓީއެމް އިން ބުނީ އޮންލައިންކޮށް ރާއްޖެ ފެންނަ ގޮތަށް ދޭ މި ވާޗުއަލް ޓުއާގައި ގިނަ އަދަދެއްގެ ރިސޯޓުތައް މިހާރުވެސް ބައިވެރިވެފައި ވާކަމަށެވެ. އެގޮތުން، އެ ކުންފުނިން ރިސޯޓުތަކާއި ގެސްޓްހައުސް ހުންނަ ރަށްރަށުގެ ހާއްސަ ފޮޓޯ އާއި ވީޑިއޯތައް ނަގައި، ޕެނެރޮމިކް ކޮށް ފެންނަ ގޮތަށް ހަދާނެ ކަމަށް ޓީޓީއެމް އިން ބުނެއެވެ.
މި މަންޒަރުތައް ދުނިޔޭގެ ކޮންމެ ހިސާބެއްގައި ހުންނަ މީހަކަށް ވެސް ވީއާރާއި ފޯނު އަދި ލެޕްޓޮޕާއި ކޮމްޕިއުޓަރުން ފަސޭހައިން ބެލޭނެ ކަމަށް ޓީޓީއެމް އިން ބުނެއެވެ.
ރާއްޖޭގެ ޓޫރިޒަމް މާކެޓް ކުރުމަށް ގިނަ ހަރަދުތަކެއް ކޮށް ގިނަ ފެއާ ތަކެއް ގައި ވަނީ ބައިވެރިވެފަ އެވެ. އަދި މިހާރު ދުނިޔެ އޮތް ހާލަތުގެ ސަބަބުން ރާއްޖޭގެ ފަތުރުވެރިކަން އިޝްތިހާރުކޮށް ކުރި އެރުވުމަށް މިހާރު މިވަނީ އިތުރު ގޮތްތައް ހޯދަން ޖެހިފަ އެވެ.
