އެ ކޮމިޝަނުން މިހެން ބުނީ ކެންޑިޑޭޓުނަށް ވުމަށް އެދި ހުށައަޅާ ފޯމުތަކަށް އީސީން ޖަވާބު ދިނުން ލަސްވާ ކަމަށް ބު ެދައްކަމުންދާ ވާހަކަތަކަށް ރައްދީ ނެރުނު ބަޔާނެއްގައެވެ.
އީސީން ބުނީ ލޯކަލް ކައުންސިލްތަކުގެ އިންތިހާބަށް ކުރިމަތިލުމަށް އެދޭ މީހާ އެކަމަށް އެދި ހުށަހަޅާ ލިޔުން އެ ކޮމިޝަނަށް ލިބޭތާ ގިނަވެގެން ފަސް ދުވަހުގެ ތެރޭގައި، އެ ހުށަހެޅުމާ މެދު ނިންމި ގޮތް އަންގަންވާނެ ކަމަށް ގާނޫނުގައި ބަޔާންކޮށްފައިވާކަމަށެވެ.
އީސީން ބުނީ ކޮމިޝަނުގައި ގާއިމްކޮށްފައިވާ ނިޒާމުތަކުގައިވާ މައުލޫމާތުތަކަކީ ރައްކާތެރިކަމާ އެކު، އެ މައުލޫމާތު ބޭނުންކުރަން ޖެހޭ ހާލަތްތަކުގައި ހުއްދަ ލިބިފައިވާ ފަރާތްތަކަށް އެކަނި ބޭނުންކުރެވޭ ގޮތަށް ފަރުމާކުރެވިފައިވާ ނިޒާމެއްކަން ރައްޔިތުންނަށް ކަށަވަރުކޮށްދޭކަމަށެވެ.
އެހެންކަމުން އެތަނުން ދެމުން އަންނަ ހިދުމަތްތަކާ ގުޅޭ ގޮތުން އާންމުންގެ މެދުގައި ނުތަނަވަސްކަން އުފެދޭ ގޮތަށް އެއްވެސް ބަޔަކު މައުލޫމާތު ނުފެތުރުމަށް އީސީން ވަނީ އިލްތިމާސްކޮށްފައެވެ.
