މި ސަރުކާރުގެ 'ބޯހިޔާވަހިކަން އެންމެންނަށް' ސިޔާސަތުގެ ދަށުން ދޫކުރާ 15،000 ގޯއްޗާއި 7،900 ފްލެޓަށް ކުރިމަތިލުމުގެ ފުރުސަތު މިހާރު ވަނީ ހުޅުވާލައިފަ އެވެ. މި ސްކީމުގެ ދަށުން މާލޭ ރައްޔިތުންނަށާއި މާލޭގައި ދިރިއުޅޭ ރައްޔިތުންނަށް ބިމާއި ފްލެޓު ދޫކުރާނެ އެވެ.

މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ދޫކުރާ 3،000 ގޯއްޗަށް ކުރިމަތިލެވޭނީ މާލޭގައި މެދުނުކެނޑި 15 އަހަރު ދިރިއުޅެފައިވާ އަދި މިހާރު ވެސް އުޅެމުންދާ މީހުންނަށެވެ.

މާލޭގައި ދިރިއުޅޭ އެހެން ރަށްރަށުގެ މީހުންނަށް އެކަން ސާބިތުކުރުމަށް ހުށަހެޅިދާނެ ލިޔެކިޔުންތަކުގެ ތެރޭގައި، ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކާއި މައުލޫމާތުތަކުން މާލޭގައި ދިރިއުޅުނުކަން ސާބިތުވާ ނަމަ، އެ އިދާރާއަކުން ދީފައިވާ ލިޔުން ހިމެނެ އެވެ. 

މީގެ ކުރިން މާލޭން ދޫކޮށްފައިވާ ބޯހިޔާވަހިކަމުގެ ސްކީމްތަކަށް ވެސް، މާލޭގައި ދިރިނޫޅޭ މީހުން ވެސް، މާލޭގައި ދިރިއުޅޭކަމުގެ ލިޔުން ކައުންސިލުން ހޯދައިގެން ފްލެޓުތަކަށް ކުރިމަތިލާފައިވެ އެވެ. އެހެންވެ، މި ސަރުކާރުގެ ބޯހިޔާވަހިކަމުގެ ސްކީމް ހުޅުވާލީ، ކައުންސިލުން ހޯދާ ލިއުމަކީ ސައްހަ ލިޔުމެއްކަން ސާބިތުކޮށްދެވޭނެ ލިޔެކިއުންތައް ހުރުން އުސޫލުގައި ލާޒިމުކޮށްފަ އެވެ. 

ފާހަގަކުރެވޭ ގޮތުގައި، މި ސަރުކާރުގެ "ބޯހިޔާވަހިކަން އެންމެންނަށް" ސްކީމުގެ ދަށުން މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ގޯތި ދޫކުރަން ހަމަޖެހިފައިވަނީ ހަމައެކަނި ރަސްމާލެއިންނެވެ.