އިންޑިއާގެ ޖުމްހޫރީ ދުވަހާ ދިމާކޮށް ނެރުނު މި ފިލްމަށް ފުރަތަމަ ދުވަހު އާމްދަނީގެ ގޮތުގައި ލިބިފައިވަނީ 30 ކްރޯޑު ރުޕީސްއެވެ. މިއީ 2026 ވަނަ އަހަރުގެ އެންމެ ބޮޑު އެއް އޯޕަނިން ކަމުގައި ވިޔަސް، މިއީ ޝާހުރުކް ހާންގެ ރެކޯޑާ ގާތްކުރާ އަދަދެއް ނޫނެވެ.
ޖުމްހޫރީ ދުވަހު ނެރުނު ފިލްމުތަކުގެ ތެރެއިން އެންމެ ބޮޑު އާމްދަނީއެއް ހޯދުމުގެ ރެކޯޑު އަދިވެސް އޮތީ 55 ކްރޯޑު ރުޕީސް ހޯދި "ޕަތާން" އަތުގައެވެ. ނަމަވެސް ސަނީ ޑިއޯލްގެ މި ފިލްމު ވަނީ ރިތިކް ރޯޝަންގެ "ފައިޓާ" ފަހަތަށް ޖައްސާލުމަށްފަހު، ޖުމްހޫރީ ދުވަހުގެ އޯޕަނިން ލިސްޓުގެ ދެވަނަ ހޯދާފައެވެ. މި ލިސްޓުގެ ތިންވަނައިގައި "ފައިޓާ" އޮތްއިރު، ހަތަރުވަނައިގައި އޮތީ "ޕަދްމާވަތު" އެވެ. އަދި ފަސްވަނައިގައި އޮތީ "އަގްނީޕަތު" އެވެ.
އަނުރާގް ސިންގް ޑައިރެކްޓްކޮށްފައިވާ މި ފިލްމުގައި ސަނީ ޑިއޯލްގެ އިތުރުން ވަރުން ދަވަން، ދިލްޖީތު ދޮސަންޖް އަދި އަހާން ޝެޓީ މުހިންމު ރޯލުތަކުން ފެނިގެންދެއެވެ. މިއީ 1997 ވަނަ އަހަރު ނުކުތް މަޝްހޫރު ފިލްމު "ބޯޑާ" ގެ ސީކުއެލްއެކެވެ. ފިލްމު ރިލީޒްކުރި ދެވަނަ ދުވަހު ލިބުނު އާމްދަނީއާއެކު ޖުމްލަ 31.46 ކްރޯޑު ރުޕީސް މިހާރު ވަނީ ލިބިފައެވެ. ކްރިޓިކުންނާއި ބެލުންތެރިންގެ ފަރާތުން ފިލްމަށް ރަނގަޅު ތަރުހީބެއް ލިބެމުން އަންނައިރު، ކުރިއަށް އޮތް ޗުއްޓީ ދުވަސްތަކުގައި ފިލްމުގެ އާމްދަނީ އިތުރުވާނެ ކަމަށް ލަފާކުރެވެއެވެ.
