ލޭ ލިބުން ދަތިވެ މި ޖަނަވަރީ މަހުގެ 22 ވަނަ ދުވަހު ބްލަޑް ސާވިސަސްއިން ވަނީ އާއްމުންގެ އެހީތެރިކަމަށް އެދިފަ އެވެ. ބްލަޑް ސާވިސަސްއިން އެދުވަހު ކުރި ޕޯސްޓުގައި ބުނީ، 6 ވައްތަރެއްގެ ލޭ އެ ސާވިސަސްއަށް ބޭނުންވާ ކަމަށެވެ. އެއީ، އޭ ޕޮޒިޓިވް، އޯ ޕޮޒިޓިވް، އޯ ނެގެޓިވް، ބީ ޕޮޒިޓިވް، އޭބީ ޕޮޒިޓިވް، ބީ ނެގެޓިވް އަދި އޯ ނެގެޓިވް އެވެ.
މިއީ ރާއްޖޭގެ ބަލްޑް ބޭންކުން ވަރަށް ބޮޑަށް ލޭ މަދުވެ، ވީހާވެސް އަވަހަކަށް ލޭ ހަދިޔާކުރުމަށް އެމްބީއެސް އިން ކުރި އިއުލާނާ ގުޅިގެން ކުރިއަށްގެންދާ ޑޮނޭޝަން ކޭމްޕެއް ކަމަށް އެޗްޑީސީ އިން ވަނީ ބުނެފަ އެވެ.
މި ކޭމްޕުގެ މަގްސަދަކީ ބްލަޑް ބޭންކުން މި ދަނޑިވަޅުގައި ލޭ މަދުވެފައިވާތީ، އެކަމަށް ހައްލު ހޯދައިދިނުމަށް އެޗްޑީސީ ސްޓާފުންގެ ފަރާތުން އެހީތެރިވެ ދިނުން ކަމަށްވެސް އެ ކޯޕަރޭޝަނުން ބުނެފައިވެ އެވެ.
ބްލަޑް ސާވިސަސްއަށް ލޭ ހަދިޔާކުރުން އޮންނަނީ ކޮންމެ ހަފްތާއެއްގެ ވެސް އާދީއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށެވެ. އެގޮތުން ކޮންމެ ދުވަހެއްގެވެސް ހެނދުނު 8 އިން ރޭގަނޑު 8 އަށް ލޭ ހަދިޔާކުރެވޭ ގޮތަށް ވަނީ ހަމަޖެހިފަ އެވެ.
