އެ ޖަމިއްޔާ އިން މިއަދު ބުނީ ދުސްތޫރީ މައްސަލައެެއްގެ ގޮތުގައި އެ މައްސަލަ ހައި ކޯޓަށް ހުށަހެޅުމަށް ފަހު، މައްސަލައާ މެދު ގޮތެއް ނިމުމުގެ ކުރިން މީޑިއާ ކޮމިޝަނުން އެއްވެސް މީޑިއާއަކަށް އަދަބު ދިނުން ހުއްޓުވުމަށްޓަކައި ވަގުތީ އަމުރަކަށް ވެސް އެދިފައިވާ ކަމަށެވެ.
ނޫސްވެރިންނަށް ގާނޫނުއަސާސީން ލިބިދީފައިވާ މިނިވަންކަމަށް އެ ގާނޫނުން ހުރަސް އަޅާ ކަމަށް އެމްޖޭއޭ އިން ގަބޫލުކުރާ ކަމަށް ވެސް ބުންޏެވެ.
އެ ޖަމިއްޔާ އިން މިއަދު ބޭއްވި ނޫސްވެރިންގެ ބައްދަލުވުމެއްގައި އެސޯސިއޭޝަންގެ ރައީސް އަހުމަދު ނާއިފް ވިދާޅުވީ، މި ގާނޫނާ މެދު އެންމެ ބޮޑު ކަންބޮޑުވުމެއް ފެށުނީންސުރެ ވެސް އޮތީ، ސަރުކާރުގެ ކޮންޓްރޯލު އޮންނަ ކޮމިޝަނަކުން މީޑިއާތައްް ރެގިއުލޭޓުކުރަން ފެށުމާ އެކު، ސަރުކާރާ ދެކޮޅުވާ ނުވަތަ ސަރުކާރު ޒިންމާދާރު ކުރުވަން މަސައްކަތްކުރާ ވަކިވަކި މީޑިއާތަކަށް ފިޔަވަޅު އަޅަން މަސައްކަތް ކުރާނެ ބިރު އޮތުމުން ކަމަށެވެ.
"އަދަދު" ނޫހުން ގެނެސްދޭ "ސިޔާސީ ކާޓޫން" ސެގްމަންޓް ހުއްޓުވުމަށް ކޮމިޝަނުން އެންގުމަކީ އެކަންކަން ސާބިތުވެގެން ދިޔަ ކަމެއް ކަމަށް ނާއިފް ވިދާޅުވި އެވެ. ގާނޫނު ބާތިލުކުރަން ހައި ކޯޓަށް މައްސަލައެއް ހުށަހެޅީ، މީޑިއާ ކޮންޓްރޯލް ގާނޫނުގެ ދަށުން ސަރުކާރު ޒިންމާކުރުވަން މަސައްކަތްކުރާ މީޑިއާތަކަށް ކޮމިޝަނުން ފިޔަވަޅު އަޅަން މަަަސައްކަތްކުރާނެ ކަމަށް ގަބޫލުކުރެވޭތީ ކަމަށް ނާއިފް ވިދާޅުވި އެެވެ.
އެމްޖޭއޭ އިން އެދުނު ވަގުތީ އަމުރުގައި އެދުނީ ހައި ކޯޓުން މައްސަލައިގައި ވަކި ގޮތެއް ކަނޑައަޅަންދެން އެ ގާނޫނުގެ ދަށުން އެއްވެސް ފަރާތަކާ މެދު ފިޔަވަޅު ނޭޅުމަށް އެމްއެމްބީސީ އަށް އަންގައި އަމުރުކޮށް ދިނުމަށެވެ.
އަދި އެފަދަ ވަގުތީ އަމުރަކަށް އެދުނީ އިމެއް ނެތި ބާރުގެ ބޭނުންކޮށްގެން މީޑިއާތަކާ ދެކޮޅަށް އަދި ނޫސްވެރިންނާ ދެކޮޅަށް ފިޔަވަޅު އަޅައިފި ނަމަ، އަދުލުވެރިކަމާ އެކު ފިޔަވަޅުތައް އެޅުމުގެ ހައްގަށް ހުރަސް އެޅި، މީޑިއާތަކާއި ނޫސްވެރިންގެ މަސައްކަތް ހުއްޓާލަން ޖެހި، ނުވަތަ ޖޫރިމަނާ ފަދަ އަދަބުތަކާ ވެސް ކުރިމަތިލާން ޖެހިދާނެތީ ކަމަށް ބުންޏެވެ.
