މަސްޖިދުއްރަހުމާ މިސްކިތަކީ، ހެޔޮއެދޭ ފަރާތަކުުން އެ ރަށުގެ ރައްޔިތުންނަށްޓަކައި ބިނާކޮށްދިން މިސްކިތެކެވެ.
މި މިސްކިތް ހުޅުވުމަށް އޮމަދޫގައި ވަނީ ހާއްސަ ރަސްމިއްޔާތެއް ބާއްވާފަ އެވެ. މި ރަސްމިއްޔާތުގައި އޮމަދޫ ކައުންސިލްގެ އިސްވެރިންނާއި ރަށުގެ ގިނަ އަދަދެއްގެ ރައްޔިތުން ބައިވެރިވި އެވެ.
މި ރަސްމިއްޔާތުގައި، މަސްޖިދުއްރަހުމާ ރަސްމީކޮށް ހުޅުވައިދެއްވީ، އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޒް އަބްދުލް އަޒީޒް ޖަމާލް އަބޫބަކުރެވެ.
އިސްލާމިކް މިނިސްޓްރީން ބުނީ މިއީ ރައީސް ޑރ. މުހައްމަދު މުއިއްޒުގެ ސަރުކާރުން އިސްލާމީ ދީނަށް ލޯބިޖެއްސުމާއި، މިސްކިތްތައް ބިނާކޮށް އާބާދުކުރުމަށް ދެއްވާ އަހައްމިއްޔަތުގެ ދަށުން ކުރިއަށްދިޔަ މުހިންމު މަސައްކަތެއް ކަމަށެވެ.
މިސްކިތް ހުޅުވައިދެއްވުމަށްފަހު، ސްޓޭޓް މިނިސްޓަރު ވަނީ މިސްކިތް ބިނާކޮށްދެއްވި ފަރާތަށް ޝުކުރު އަދާކުރައްވައި، މިސްކިތުގެ ބޭނުން އެންމެ ހެޔޮގޮތުގައި ހިފުމަށް ރަށުގެ ރައްޔިތުންނަށް އިލްތިމާސްކުރައްވާފަ އެވެ.
ރާއްޖޭގެ އެކިކަންކޮޅުތަކުގައި އިމާރާތްކުރަން ފަށާފައިވާ މިސްކިތްތަކުގެ މަސައްކަތުގެ ދުވެލި އަވަސްކޮށް ވީހާވެސް އަވަހަށް މަޝްރޫއުތައް ނިންމުމަށް އިސްލާމިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ. މިގޮތުން ކުރިއަށް އޮތް ރަމަޟާން މަހުގެ ކުރިން 15 މިސްކިތެއް ހުޅުވުމަށް އަންނަނީ ތައްޔާރުވަމުންނެވެ.
