ޝަރުއީ ދާއިރާގެ މާލީ މިނިވަންކަން ކަށަވަރު ކުރުމަށް އެ ދާއިރާގެ މާލީ ކަންކަމުގައި އަމަލު ކުރާނެ އުސޫލެއް އެކުލަވާލައިފި އެވެ.
Advertisement
ފިނޭންސް މިނިސްޓްރީން މިދިޔަ ހަފްތާގައި އާންމުކުރި ޝަރުއީ ދާއިރާގެ ގުޅުންހުރި މާލީ ކަންކަމުގައި އަމަލުކުރާނެ ގޮތުގެ އުސޫލަކީ އަދުލު އިންސާފުގެ ދާއިރާއަށް ދައުލަތުގެ ބަޖެޓުން ކަނޑައަޅާ ފައިސާ ރޭވުމާއި، ދޫކުރުމާއި، ބެލެހެއްޓުމުގެ އިތުރުން ރިޕޯޓްކުރުމަށްޓަކައި އެ ދާއިރާއަށް ހާއްސަ އޮނިގަނޑެއް އެކަށައެޅުމުގެ މަގުސަދުގައި އެކުލަވާލާފައިވާ އުސޫލެކެވެ.
އެ އުސޫލުގައިވާ ގޮތުން، މާލީ މުއާމަލާތްތައް ހަރުދަނާކޮށް ބެލެހެއްޓުމަށް ޝަރުއީ ދާއިރާއަށް ދޭ ޖުޑީޝަރީ ސެކްޓޯރަލް ގްރާންޓް އެހީ ލިބުމާއި ބެލެހެއްޓުން އަދި ހަރަދުކުރަން ވާނީ މާލީ ވުޒާރާއިން ކަނޑައަޅާ ގޮތެއްގެ މަތިން މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގައި ހުޅުވާފައިވާ ހާއްސަ އެކައުންޓެއް މެދުވެރިކޮށެވެ.
މި އުސޫލުގައިވާ އެންމެ މުހިންމު އެއް ނިންމުމަކީ، ކޮންމެ އަހަރަކު ދައުލަތަށް ލިބޭނެކަމަށް އަންދާޒާކުރާ އާމްދަނީގެ ދެ އިންސައްތަ އަށްވުރެ މަދުނޫން މިންވަރެއް ޝަރުއީ ދާއިރާއަށް ކަނޑައަޅަންވާނެ ކަމަށް ބަޔާންކުރުމެވެ. މި މިންވަރު ހިސާބުކުރުމުގައި ވަކި ކަމަކަށް ހާއްސަކޮށްފައިވާ އާމްދަނީއާއި އަލަށް ތައާރަފުކުރާ އާމްދަނީ އިތުރުކުރުމުގެ ފިޔަވަޅުތަކުން ލިބޭ އާމްދަނީ ނުހިމެނޭނެ އެވެ.
މާލީ ގޮންޖެހުންތައް ކުޑަކުރުމުގެ ގޮތުން، ތަކެއްޗާއި ހިދުމަތުގެ އަގު ހެޔޮކުރުމަށް އެއްވެސް ކަހަލަ ސަބްސިޑީއެއް ނުވަތަ އެހީއެއް ނުދެވޭނެކަމަށް އުސޫލުގައި ބުނެފައިވެ އެވެ. އަދި ބަދަލުގެ ގޮތުގައި ފައިސާ ދޭންޖެހޭ ހާލަތްތަކުގައި އެ ފައިސާ ދޫކުރެވޭނީ ކޯޓުގެ ނިހާއީ ހުކުމަކަށްފަހު، ޝަރުއީ ދާއިރާގެ ބަޖެޓުން ކަމަށް ވެސްވެ އެވެ.
ބަޖެޓު ހިންގުމާއި ބެލެހެއްޓުމުގެ އިޖުރާއަތުތައް ވެސް މި އުސޫލުގައި ބަޔާންކޮށްފައި ވެއެވެ. އޭގެ ތެރޭގައި ހިމެނެނީ:
- މަޝްރޫއުތަކަށް ފައިސާ ހޯދުމާއި ހަރަދުތައް ބެލެހެއްޓުމުގެ ސިޔާސަތުތައް އެކަށައެޅުމުގެ ޒިންމާ އުފުލާނީ ޗީފް ޖުޑީޝަލް އެޑްމިނިސްޓްރޭޓަރު.
- މާލީ ޒިންމާދާރު ވެރިޔާ އެ ސިޔާސަތުތަކާ އެއްގޮތަށް ބަޖެޓު ތަންފީޒުކުރުމުގެ ޒިންމާ އުފުލުން.
- ކަނޑައެޅިފައިވާ ބަޖެޓުން ބޭރުން ކޮންމެހެން ކުރަންޖެހޭ ހަރަދެއް ކުރިމަތިވެއްޖެނަމަ، އެ ޚަރަދެއް ކުރުމުގެ ކުރިން ސަޕްލިމެންޓްރީ ބަޖެޓެއް ފާސްކުރުން.
- މިފަދަ ބަޖެޓެއްގެ ސަބަބުތަކާއި ތަފުސީލު މާލީ ވުޒާރާއަށް ހުށަހަޅައި، އާންމުކުރުން.
ތަރައްގީގެ މަޝްރޫއުތަކާ ގުޅޭ ގޮތުން އުސޫލުގައި ވަނީ، ޝަރުއީ ދާއިރާގެ ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) މަސައްކަތްތަކަށް ޚަރަދުކުރާނީ އެ ދާއިރާއަށް ދެވޭ ސެކްޓޯރަލް ގްރާންޓް އެހީގެ ތެރެއިން ކަމަށެވެ. ނަމަވެސް، ވަކި ޝަރުތުތަކަކާއެކު ދައުލަތުން އިތުރު އެހީ ފޯރުކޮށްދިނުމުގެ ފުރުސަތު އޮންނާނެ ކަމަށް އުސޫލުގައި ވެއެވެ. މިފަދަ އެހީއެއް ދިނުމުގެ ކުރިން، ކަމާބެހޭ ސަރުކާރުގެ އިދާރާއަކާއި ޑީޖޭއޭއާ ދެމެދު އެއްބަސްވުމެއްގައި ސޮއިކޮށް، ދައުލަތުން ބޭރުގެ ފަރާތްތަކުން ލިބޭ އެހީގެ ތަފުސީލު ވެސް ފިނޭންސް މިނިސްޓްރީއަށް ހުށަހަޅަންޖެހޭނެ ކަމަށް ބަޔާންކޮށްފައި ވެއެވެ.
މި ބަދަލާއެކު ދިވެހިރާއްޖޭގެ ޖުޑިޝަރީގެ މާލީ މިނިވަންކަން ކަށަވަރުކުރެވި، އެ ދާއިރާގެ ބެޖެޓު ތަންފީޒުކުރުމާއި ރިޕޯޓުކުރުމުގެ ނިޒާމު އިތުރަށް ހަރުދަނާވެގެންދާނެ ކަމަށް އެ މިނިސްޓްރީން ބުންޏެވެ.
