ފުޓްސަލް ޓީމުން ހޯދި ކާމިޔާބު ފާހަގަކުރަން ސްޕޯޓްސް މިނިސްޓްރީން މިރޭ ބޭއްވި ހަރަކާތުގައި ރައީސް މުއިއްޒު އެ ޓީމާ މުހާތަބުކޮށް ވާހަކަފުޅު ދައްކަވާނެ ކަމަށް ކުރިން އޮތީ މިނިސްޓްރީން ބުނެފައެވެ. އެކަމަކު ޓީމަށް މަރުހަބާ ކިޔުމުގެ ހަފްލާގައި ރައީސް ބައިވެރިވެވަޑައިނުގަންނަވައެވެ.
މިނިސްޓްރީން ކުރިން ބުނީ ސާފްގެ ފުރަތަމަ ފުޓްސަލް ޗެމްޕިއަންޝިޕްގެ ތަށި ރައީސްގެ އަތްޕުޅަށް ގައުމީ ޓީމުން އަރުވާނެ ކަމަށާއި އޭގެ ފަހުން ހަވާ އަރުވާނެ ކަމަށެވެ. އެކަމަކު ރައިސް ވަޑައިނުގަންނަވާ މި ހަފްލާގައި ސާފްގެ ތަށި އެރުވީ މިނިސްޓަރު އަތްޕުޅަށެވެ. އޭގެ ފަހުން ހަވާވެސް އެރުވިއެވެ. މި ހަރަކާތުގައި ގިނަ އަދަދެއްގެ އާއްމުން ބައިވެރިވެއެވެ.
ތައިލެންޑްގެ ވެރިރަށް ބެންކޮކްގައި އޮތް މުބާރާތުގައި ކުޅުނު ހުރިހާ މެޗެއް ކާމިޔާބުކޮށްގެން ރާއްޖެ މި މުބާރާތް ނިންމާލިއިރު، މިއީ ސަރަހައްދީ ގޮތުން ބޭއްވި ފުރަތަމަ ފުޓްސަލް މުބާރާތެވެ. މި މުބާރާތުގެ ކާމިޔާބީއާއެކު ސަރުކާރުން ވަނީ އިތުރު އިންވެސްޓުމަންޓު ތަކެއް ފުޓްސަލްއަށް ކުރުމަށް ނިންމާފަ އެވެ.
