އަންނަ ކައުންސިލް އިމްތިހާބުގައި ހުޅުމާލެ އުތުރަށް އެމްޑީޕީގެ ޓިކެޓުގައި ވާދަކުރާ ޒަހިއްޔާ ފުލުހުންގެ މަރުކަޒަށް ހާޒިރުވާން އެންގީ މިދިޔަ އޮކްޓޯބަރު މަހު އޭނާ ފޭސްބުކްގައި ޖެހި ޕޯސްޓަކާ ގުޅިގެންނެވެ. ޒަހިއްޔާގެ ބަޔާން ނަގަން މިއަދު މެންދުރު 14:00 ފުލުހަށް ހާޒިރުވުމަށް އޭނާއަށް އެންގީ އިއްޔެ އެވެ.
ޒަހިއްޔާ އެކްސްގައި ކުރި ޕޯސްޓެއްގައި ވިދާޅުވީ ފުލުހުންގެ މަރުކަޒަށް މިއަދު ދާން އެންގި ޗިޓް ކެންސަލް ކޮށްފައިވާކަން ރޭ ފުލުހުން ގުޅާ އެނގިކަމަށެވެ.
ޒަހިއްޔާ ފުލުހުންގެ މަރުކަޒަށް ހާޒިރުކޮށް ތަހުގީގުކުރަނީ ފުލުހުންނަށް އިންޒާރު ދީފައިވާ ކަމަށް ތުހުމަތުކުރާ މައްސަލާގަ އެވެ. ފޭސްބުކްގައި ޒަހިއްޔާ މިދިޔަ އޮކްޓުބަރުމަހު ކުރި ޕޯސްޓެއްގައި ވަނީ "17 ނޮވެމްބަރަށް ތައްޔާރުވުމަށް ކަނޑޫދޫ މިރުހުން ސްޕްރޭ ތައްޔާރުކުރަން ފަށައިފިން. ހަމަ ޖެހީ، ހަމަ ޖެހީ،" މި ގޮތަށެވެ.
މި މައްސަލައިގައި މީގެ ކުރިންވެސް ފުލުހުން ވަނީ ކޯޓު އަމުރެއްގެ ދަށުން ޒަގިއްޔާގެ ފޯނު ހިފަހައްޓައިފައެވެ. ފުލުހުންގެ އަތުގައި ފޯނުވަނިކޮށް އެ ފޯނުގައި ހުރި ޒަހިއްޔާގެ ޒާތީ ވީޑިއޯތަކެއް ލީކުވި މައްސަލަ ފެންމަތިވިއެވެ. ކާކުކަން ނޭނގޭ އެކައުންޓަކުން އެކްސްަގައި އެ ވީޑިއޯތައް ލީކުކޮށްލުމުން ފުލުހުން ވަނީ އޭނާގެ ފޯނު ދޫކޮށްލާފައެވެ.
