ކައުންސިލްތަކުގެ އިންތިހާބުގައި ވާދަކުރުމަށް ހުޅުވާލާފައިވަނީ މި މަހުގެ 17 އިން ފެށިގެން އަންނަ މަހުގެ 1 ވަނަ ދުވަހުގެ ނިޔަލަށެވެ. އެއީ 14 ދުވަހެވެ.
އެ މުއްދަތު ކުރުވުމުން އެމްޑީޕީން އިއްޔެ ވެސް ކަންބޮޑުވުން ފާޅުކޮށްފައިވާއިރު، މިއަދު ބޭއްވި ނޫސްވެރިންގެ ބައްދަލުވުމެއްގައި ވެސް މައިގަނޑު ގޮތެއްގައި ދެއްކީ އެ ވާހަކަ އެވެ.
ވަހީދު ވިދާޅުވީ އިންތިހާބުގައި ވާދަކުރާ ކެންޑިޑޭޓުންގެ ރެކޯޑު ސާފުކުރުމަށް މަސައްކަތްތައް ކުރަމުންދާއިރު ކަރެކްޝަނަލް ސާވިސް އާއި ޖުޑީޝަލް ސާވިސް އިން ރެކޯޑުތައް ސާފުކުރަން ލަސްތަކެއް ދިމާވާ ކަމަށެވެ.
އިންތިހާބަށް ގިނަ ބަޔަކު ކުރިމަތިލާނެކަން ދަނެ އެކަމަށް ބައެއް ތަންތަނުން ތައްޔާރުވެފައި ނެތް ކަމަށާއި ފޯމުތައް ޕްރޮސެސްކުރަން ހަތަރު ދުވަސްވެސް ނަގާ ކަމަށް ވަހީދު ވިދާޅުވި އެވެ.
ވަހީދު ވިދާޅުވީ އިންތިހާބަށް ކުރިމަަތިލުމުގެ މުއްދަތު އިލެކްޝަނުން އިތުރުކޮށް ނުދީފި ނަމަ އެހެން ވަސީލަތްތައް މެދުވެރިކޮށް ހައްގު ހޯދުމަށް މަސައްކަތް ކުރާނެ ކަމަށެވެ.
މި އަހަރު އިންތިހާބަށް ކުރިމަތިލާ މީހުން ހުރިހާ ލިޔެކިޔުންތަކާއި، އިދާރީ ފީ ދައްކަން މިފަހަރު ޖެހެނީ އިލެކްޝަންސް ކޮމިޝަނުގެ މައި ޕޯޓަލް މެދުވެރިކޮށެވެ. ހުށަހެޅުންތަކާމެދު ނިންމި ގޮތާއި ކެންޑިޑޭޓުންނަށް އަންގަންޖެހޭ އެންގުންތައް އިލެކްޝަނުން އަންގާނީ ވެސް ޕޯޓަލް މެދުވެރިކޮށެވެ.
ލޯކަލް ކައުންސިލްތަކަށާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ކުރިމަތިލާން އީސީން ހުޅުވާލީ މިމަހުގެ 17 ވަނަ ދުވަހު އެވެ. އިންތިހާބުގައި ވާދަކުރަން ފޯމު ހުށަހެޅުމުގެ ސުންގަޑިއަކީ އަންނަ އާދީއްތަ ދުވަހުގެ 3:00 އެވެ.
