ހައްޖު މޫސުން ފިޔަވައި، އަހަރުގެ ކޮންމެ ދުވަސްވަރެއްގައި ވެސް އުމްރާ ކުރެވޭނެ "ކުރު އުމްރާ" ޕެކޭޖެއް މިހާރު ތައާރަފު ކޮށްފައިވާ ކަމަށާއި އަހަރުގެ ތެރޭގައި ލިބޭ ކުރު ޗުއްޓީއެއް ނުވަތަ އެ ނޫން ވެސް ދުވަސްވަރެއްގައި އާއިލާ އާއި ރަހުމަތްތެރިން ނުވަތަ އެކަނި އުމްރާ ކުރުމަށް ފަސޭހަ އިންތިޒާމުތަކަކާ އެކު، ތައާރަފު ކުރި ޕެކޭޖެއް ކަމަށް އެ ކޯޕަރޭޝަނުން ބުނެ އެވެ.
އެ ޕެކޭޖުގެ ދަށުން ދަތުރުކުރާނެ ދުވަސް އިހުތިޔާރު ކުރާނީ އެ މީހަކު އަމިއްލަ އަށް ކަަމަށާއި އުމްރާ އަށް ފުރާނެ ދުވަހާއި އެނބުރި އަންނަން ބޭނުންވާ ދުވަހާއި ބޭނުންވާ ފްލައިޓާއި ހުންނަން ބޭނުންވާ ހޮޓަލާއި ސައުދީގައި ދަތުރު ކުރާނެ އުޅަނދާއި ޒިޔާރަތްކުރަން ބޭނުންވާ ތަންތަން ވެސް ހިޔާރު ކުރާނީ އަމިއްލަ އަށް ކަމަށް އެ ކޯޕަރޭޝަނުން ބުންޏެވެ.
މި ޕެކޭޖްގެ ދަށުން ވަރަށް ބައިވަރު ކަންކަން އަމިއްލަ އަށް އިހްތިޔާރު ކުރުމުގެ ފުރުސަތު ލިބިގެންދާނެ ކަމަށް އެ ކޯޕަރޭޝަނުން ވަނީ ފާހަގަ ކޮށްފައި އެވެ.
އެ ގޮތުން އުމްރާގެ ދަތުރު ކުރާނެ ފްލައިޓާއި ދަތުރު ކުރާނެ ކްލާހާއި، އުމްރާގެ އަޅުކަން އަދާކުރަން ސައުދީ އަރަބިއްޔާގައި ހުންނާނެ ހޮޓަލާއި ހޮޓަލުގެ ފެންވަރާއި ހޮޓާ ހިފަން ބޭނުންވާ ސަރަހައްދު، ސައުދީ އަރަބިއްޔާގެ ތެރޭގައި ދަތުރުކުރަން ބޭނުންވަނީ ކޮން ކަހަލަ އުޅަނދެއްގައި ކަމާއި އުޅަނދުގެ ފެންވަރު، ބަލައިލަން ބޭނުންވާ ނުވަތަ އެތަނަކަށް ޒިޔާރަތް ކޮށްލަން ބޭނުންވާ ހާއްސަ ތަނެއް ހުރި ނަމަ އެ ތަންތަނަށް އެ މީހަކަށް އެންމެ ފަސޭހަ ގަޑިތަކެއްގައި ދިއުމުގެ އިތުރުން ގުރޫޕުތަކާ ނުގުޅި، އެ މީހަކު ބޭނުން ގަޑިއެއްގައި ފަސޭހަ ގޮތަކަށް އުމްރާގެ އިންތިޒާމުތައް ހަމަޖައްސައިދޭނެ ކަމަށް އެ ކޯޕަރޭޝަނުން ވަނީ ބުނެފައި އެވެ.
މިކަމާއި ގުޅިގެން އިތުރު މައުލޫމާތަށް އެ ކުންފުނީގެ ހޯޓްލައިން ނަމްބަރު ނުވަތަ ފޯން ނަމްބަރުން ލިބިގެންދާނެ ކަމަށް އެ ކޯޕަރޭޝަނުން ފާހަގަ ކޮށްފައިވެ އެވެ.
