މިކަމަށް ހައްލެއް ހޯދުމަށް ބޮޑެތި ހަރަދުކޮށްގެން އެކި ކަހަލަ ކްރީމްތައް ބޭނުންކުރި ނަމަވެސް، އެދެވޭ ނަތީޖާއެއް ނުލިބެއެވެ. ނަމަވެސް، ސިއްހީ މާހިރުންނާއި ފަހުގެ ދިރާސާތަކުން ދައްކާ ގޮތުގައި ރީތި އޮމާން ހަންގަނޑެއް ހޯދުމަށް ކުރެވޭނެ އެންމެ މުހިންމު، އަދި އެންމެ ފަސޭހަ ކަމަކީ ކެއުމުން ހަކުރު ދުރުކޮށްލުމެވެ.
ދިރާސާތަކުން ދައްކާ ގޮތުގައި ހަކުރު ގިނައިން ކެއުމުން ހަށިގަނޑުގައި "ގްލައިކޭޝަން" ކިޔާ ޕްރޮސެސްއެއް ހިނގައެވެ. މީގެ ސަބަބުން ހަންގަނޑު ދެމުމަށް އެހީވެދޭ "ކޮލަޖެން" އާއި "އިލާސްޓިން" އަށް ބޮޑެތި ގެއްލުންތަކެއް ލިބެއެވެ.
ބިހި ނެގުމާއި ހަކުރު ކެއުމާ ހުރި ގުޅުމާ ބެހޭގޮތުން "އެމެރިކަން އެކަޑަމީ އޮފް ޑާމަޓޮލޮޖީ" އިން ހާމަކޮށްފައިވާ ދިރާސާއެއްގައި ބުނެފައިވަނީ، ހަކުރު ގިނައިން އެކުލެވޭ ކާނާ ކެއުމުން ލޭގައި އިންސިއުލިން ހުންނަ މިންވަރު ކުއްލިއަކަށް މަތިވާ ކަމަށެވެ. މީގެ ސަބަބުން ހަށިގަނޑުގައި ދުޅަ އުފެދި، ހަންގަނޑުގައި ތެޔޮ އުފެދޭ މިންވަރު އިތުރުވެ، ބިހި ނެގުމަށް މަގުފަހިވެއެވެ. މި ދިރާސާގައި ބުނެފައިވާ ގޮތުގައި "ލޯ ގްލައިސެމިކް" ނުވަތަ ހަކުރު މަދު ކެއުމެއް ހިޔާރުކުރާ މީހުންގެ މޫނުގައި ބިހި ނަގާ މިންވަރު 50 ޕަސަންޓު ދަށެވެ.
ހަމުގެ މާހިރުން ލަފާދެނީ ޕެކެޓުކޮށްފައި ހުންނަ ތައްޔާރީ ކާނާއާއި، ސޮޑާ އަދި ފޮނި ބުއިންތަކާ ދުރުވުމަށެވެ. އޭގެ ބަދަލުގައި މޭވާއާއި ތަރުކާރީ ގިނައިން ކެއުމަށާއި ގިނައިން ފެން ބުއިމަށް އާދަކުރުމުން، ކުރު މުއްދަތެއްގެ ތެރޭގައި ހަންގަނޑަށް ހެޔޮ ބަދަލުތަކެއް އަންނާނެ ކަމަށް ޑޮކްޓަރުން ބުނެއެވެ.
