ތިލަފުށީގައި ބީއެމްއެލް އޭޓީއެމްގެ ޚިދުމަތް ރަސްމީކޮށް ފެށުމަށް މިއަދު އެރަށުގައި ބޭއްވި ރަސްމިއްޔާތުގައި ރަސްމީކޮށް ހިދުމަތް ފަށްޓަވާ ދެއްވީ އިކޮނޮމިކް މިނިސްޓަރު މުހައްމަދު ސައީދެވެ. އެ ރަސްމިއްޔާތުގައި ބީއެމްއެލްގެ ސީއީއޯ އަދި މެނޭޖިން ޑިރެކްޓަރ މުހައްމަދު ޝަރީފާއި، ބޭންކުގެ ޗެއާމަން އަހްމަދު ޢަލީ ހަބީބާއި، އެ ބޭންކުގެ އިސްވެރިން ބައިވެރިވެވަޑައިގެންނެވިއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރު ސައީދު ވިދާޅުވީ، ވިޔަފާރިވެރިންނާ އެކު ރައީސް ބޭއްވެވި ބައްދަލުވުމުގައި ވިޔަފާރިވެރިން ހުށަހެޅި އެންމެ މުހިންމު އެއް ކަމަކީ، ތިލަފުށީގައި އޭޓީއެމްގެ ހިދުމަތް ލިބެން ނެތުން ކަމަށެވެ. އެހެންކަމުން ތިލަފުށީގައި އޭޓީއެމްގެ ހިދުމަތް ފެށިގެން ދިޔުމަކީ އެތައް ޒަމާނެއް ވަންދެން ވިޔަފާރިވެރިން އެދެމުން ދިޔަ ކަމަކަށް އެދެވޭ ހައްލެއް ލިބިގެންދާނެ ކަމެއްގެ ސައީދު ވިދާޅުވިއެވެ.
"މުޅި ރާއްޖެއަށް ބީއެމްއެލް އޭޓީއެމް" މަޝްރޫއުގެ ދަށުން މިހާތަނަށް 20 އަތޮޅުގެ 105 ރަށެއްގައި އޭޓީއެމް ބަހައްޓާ ހިދުމަތް ދޭން ވަނީ ފަށާފައެވެ. މި މަޝްރޫއުގެ ދަށުން ފުރަތަމަ އޭޓީއެމް ބެހެއްޓީ މިދިޔަ އަހަރުގެ ފެބްރުއަރީ މަހުގައެވެ.
