ސައިންސްވެރިން ބުނާ ގޮތުގައި ބަނޑުހައިވެފައި ހުންނަ ވަގުތުތަކުގައި ސިކުނޑީގެ މަސައްކަތްތައް ހަލުވިވެ، ވިސްނުން ތޫނުކޮށްދެއެވެ.
އެމެރިކާގެ ނޭޝަނަލް އިންސްޓިޓިއުޓް އޮން އޭޖިންގެ ދިރާސާތަކުން ހާމަވާ ގޮތުގައި، ގިނައިރު ނުކައި ހުރުމުން ހަށިގަނޑުގައި "ބީޑީއެންއެފް" ކިޔާ ޕްރޮޓީންއެއް އުފެދުން އިތުރުކޮށްދެއެވެ. މިއީ ސިކުނޑީގެ ނާރުތައް ވަރުގަދަކޮށް، ހަނދާން ގަދަކުރުމަށާއި ކަންކަމަށް ސަމާލުކަން ދިނުމުގެ ގާބިލުކަން އިތުރުކޮށްދޭ މާއްދާއެކެވެ. މިއީ ކިޔަވާ ކުދިންނާއި ވަޒީފާތަކުގައި އުޅޭ މީހުންނަށް ރޯދަ މަހު ލިބޭނެ ވަރަށް ބޮޑު ފައިދާއެކެވެ.
މީގެ އިތުރުން، ދިރާސާތަކުން ދައްކާ ގޮތުގައި ރޯދައަށް ހުންނައިރު ހަށިގަނޑުގެ ސެލްތައް ސާފުވުމުގެ މަސައްކަތް ނުވަތަ "އޮޓޯފަޖީ" ގެ މަސައްކަތް ފަށައެވެ. މިއީ ސިކުނޑީގައި ހުންނަ ބޭކާރު މާއްދާތައް ނައްތާލައި، އުމުރުން ދުވަސްވުމުން ޖެހޭ ސިކުނޑީގެ ބަލިތަކުން ރައްކާތެރިވުމަށް އެހީވެދޭ ކަމެކެވެ.
މި ދިރާސާތަކަށް ބަލާއިރު، އަންނަ މަހު ފަށާ ރޯދަ މަހަކީ ހަށިގަނޑާއި ސިކުނޑި ރީސެޓް ކޮށްލުމަށް ލިބޭ ރަނުގެ ފުރުސަތެކެވެ. ސިއްހީ މާހިރުން ލަފާދެނީ ރޯދަ ވީއްލާ ވަގުތު ސިއްހަތަށް ފައިދާހުރި ކާނާ ބޭނުންކުރުމަށާއި، މި ފައިދާތައް އެންމެ ފުރިހަމައަށް ހޯދުމަށް ނިދުމުގެ އާދަތައް ވެސް ރަނގަޅު ކުރުމަށެވެ.
