ހާވާޑް ޔުނިވާސިޓީން 80 އަހަރަށް ވުރެ ގިނަ ދުވަހު ކުރިއަށް ގެންދިޔަ ދުނިޔޭގެ އެންމެ ދިގު އެއް ދިރާސާއިން ދައްކާ ގޮތުގައި، މީހާގެ އުމުރު ދިގުވުމާއި ބަލިތަކުން ރައްކާތެރިވުމަށް އެންމެ ބޮޑު ދައުރެއް އަދާކުރަނީ ކޮލެސްޓްރޯލް ލެވެލް ދަށްވުމެއް ނޫނެވެ. އެއީ ގާތް މީހުންނާ އެކު އޮންނަ ހަރުދަނާ ގުޅުމެވެ. މި ދިރާސާގެ ހޯދުންތަކުން ދައްކާ ގޮތުގައި ދިގު މުއްދަތަކަށް އެކަނިވެރިވެފައި ހުރުމަކީ ދުވާލަކު 15 ސިނގިރޭޓު ބުއިން ފަދަ ނުރައްކާތެރި، އަދި ސިއްހަތަށް ގެއްލުން ހުރި ކަމެކެވެ.
އެމެރިކާގެ ސާޖަން ޖެނެރަލް ވެސް ވަނީ އެކަނިވެރިކަމަކީ "ވަބާއެއް" ގެ ގޮތުގައި ސިފަކޮށްފައެވެ. ސިއްހީ މާހިރުން ބުނާ ގޮތުގައި އާއިލާއާ އެކު ކެއުމެއްގައި ބައިވެރިވުން ނުވަތަ އެކުވެރިންނާ އެކު ހިނގާލަން ދިއުމުން ހަށިގަނޑުގައި "އޮކްސިޓޯސިން" ކިޔާ ހޯމޯންއެއް އުފެދެއެވެ. މިއީ ސްޓްރެސް ކުޑަކޮށްދީ، ހިތުގެ ބަލިތަކުން ދުރުކޮށްދޭ މުހިންމު މާއްދާއެކެވެ.
ހަށިގަނޑު ރީތިކުރަން ކޮންމެ ދުވަހަކު ޖިމަށް ދާ ވަގުތު ކުޑަކޮށްފައި ނަމަވެސް، މަންމަ އާއި ބައްޕަ ނުވަތަ ދަރިންނާ އެކު ވަގުތު ހޭދަކޮށްލުމަކީ މުހިންމު ކަމެކެވެ. ސައިންސްވެރިން ލަފާދެނީ ހަފްތާއަކު އެއް ފަހަރު ނަމަވެސް އާއިލާ އެއްކޮށް ވަގުތު ހޭދަކޮށް، ފޯނާ ދުރަށް ޖެހިލައި އެކަކު އަނެކަކާ ވާހަކަ ދައްކައި ގުޅުން ބަދަހި ކުރުމަށެވެ.
