އެ ރަށު ކައުންސިލުގެ ޒިންމާދާރުވެރިޔާ އަހުމަދު ޒިޔާއު ސީއެންއެމްއަށް މިއަދު ވިދާޅުވީ، މި ކޮޅިގަނޑުގައި އެރަށުގެ ދުވަސްވީ ގަސްތައް ވެއްޓި ބޮޑެތި ގެއްލުންތަކެއް ވެފައިވާ ކަމަށެވެ.
ޒިޔާއު ވިދާޅުވި ގޮތުގައި އާބާދީގައި 600 އަށް ވުރެ ގިނަ މީހުން އުޅެމުން އަންނަ ވާދޫގެ ބައެއް ގެތަކުގެ ފާރުވެއްޓި، ގޭގޭގައި އިންދާފައި ހުރި ބަނބުކެޔޮ އަދި ޖަމްބުރޯލު ގަސްތައް ވެއްޓިފައިވެ އެވެ. މި ގަސްތައް ބައެއް ގެތަކުގެ ފުރާޅުތަކަށް ވެއްޓި ފުރާޅުތައް ވެސް ހަލާކުވެފައިވާއިރު އަނެއް ބައި ގެތަކުގެ ފުރާޅު ގަދަ ކޮޅިގަނޑުގައި އެއްލާލާލަފައިވާ ކަމަށް ވެސް ވިދާޅުވި އެވެ.
އޭގެ އިތުރުން، ބަނދަރުގައި ހުރި ލައިޓް ޕޯސްޓެއް ވެސް ވެއްޓިފައިވާއިރު މި ކޮޅިގަނޑުގައި އެރަށުގެ ސްކޫލަށް ވެސް ވަނީ ބޮޑު ގެއްލުމެއްވެފަ އެވެ.
ޒިޔާއު ވިދާޅުވީ، ސްކޫލުގެ ފާރުތަކާއި އިނދާފައި ގަސްތައް ވެސް ހަލާކުވެފައިވާއިރު ސްކޫލުގެ މޮޓޯ ދައްކުވައިދޭ ގޮތަށް ހަދާފައިރު ހުރި ފާރުވެސް ވެއްޓި ބޮޑު ގެއްލުމެއްވެފައިވާ ކަމަށެވެ. އަދި ރަށުގައި ފައިބަރު މަަސައްކަތް ކުރާ ހަރުގެއަށް ވެސް އެކި ވަރުގެ ގެއްލުންތައް ވަނީ ލިބިފަ އެވެ.
ސްކޫލަށް ލިބުނު ބައެއް ގެއްލުން-- ފޮޓޯ: ވާދޫ ކައުންސިލް
އޭގެ އިތުރުން އޭނާ ވަނީ ޑިޒާސްޓާ މެނޭޖްމަންޓް އޮތޯރިޓީއަށް މިކަން ހިއްސާކުރުމަށް މަސައްކަތް ކުރި ނަމަވެސް އެކަން އަދި ކާމިޔާބު ނުވާ ކަމަށް ވިދާޅުވެފަ އެވެ. އެކަމަކު ފުލުހުންނާއި ސިފައިންގެ ސަމާލުކަމަށް މިކަން ގެނެސްފައިވާ ކަމަށް ވެސް ވިދާޅުވި އެވެ.
މިވަގުތު ކައުންސިލާއި ރަށުގެ ރައްޔިތުން ގުޅިގެން އަންނަނީ މަގުމައްޗަށް ވެއްޓިފައި ހުރި ގަސްތަކާއި ފާރުތައް ނަގައި ސާފުކުރުމުގެ މަސައްކަތް ކުރަމުންނެވެ.
