ގާސިމް މިހެން ވިދާޅުވިއިރު ޖުމްހޫރީ ޕާޓީން ވަނީ އަންނަ އޭޕްރީލް ހަތަރު ވަނަ ދުވަހު ބާއްވާ ކައުންސިލްތަކުގެ އިންތިހާބުގައި އދ. މާމިގިލި އަދި ފެންފުށީ ކައުންސިލް ފިޔަވައި، އެހެން ރަށްރަށަށް ކެންޑިޑޭޓުން ނުނެރެން ކަނޑައަޅައި، ޕީއެންސީއަށް ތާއިދު ކުރަން ނިންމައިފަ އެވެ.
ޖޭޕީގެ ލޯކަލް ކައުންސިލް އިންތިހާބުގެ ކެމްޕޭން ލޯންޗުކުރުމަށް ރޭ ބޭއްވި ޖަލްސާގައި ވާހަކަދައްކަމުން ގާސިމު އިބްރާހީމު ވިދާޅުވީ ކައުންސިލް އިންތިހާބުގައި ޕީއެންސީއަށް ތާއީދުކުރަން ނިންމީ ގައުމުގެ ހަމަޖެހުން ގެއްލި ލޮޅުމެއް އަރާފަދަ ކަމެއް ކުރަން ބޭނުން ނުވާތީ ކަމަށެވެ.
އެގޮތުން ގައުމުގެ ދަރަނިތައް ދެއްކޭނެ މަގުތައް ރައީސް ޑރ. މުހައްމަދު މުއިއްޒަށް ފަހިކޮށްދެވޭނީ ރައްޔިތުންގެ އެއްބާރުލުން އޮތްކަން ފުރިހަމައަށް އެމަނިކުފާނަށް ދައްކުވައިދީގެން ކަމަށްވެސް ވިދާޅުވި އެވެ.
ގާސިމް އިތުރަށް ގޮވައިލެއްވީ، ގައުމުގެ މަސްލަހަތާއި އަމާންކަމަށް ޓަކައި ޕީއެންސީއަށް ވޯޓު ދިނުމަށެވެ. އަދި އިދިކޮޅަށް ވޯޓު ދީގެން، ''ބޭނުން ނެތް ކަމެއް ކުރަނީ'' ކީއްކުރަންތޯ އޭނާ ސުވާލު އުފެއްދެވި އެވެ.
ނިންމާލައްވަމުން ގާސިމް ވިދާޅުވީ، ގައުމު އޮތް ދަރަނީގެ ހާލަތުން އަރައިގަނެވޭނީ ރައްޔިތުން ސަރުކާރަށް ފުރިހަމައަށް އެއްބާރުލުން ދީގެން ކަމަށެވެ. އެހެންކަމުން، ގައުމުގެ މުސްތަގުބަލަށްޓަކައި ހުރިހާ ރައްޔިތުންވެސް ޕީއެންސީގެ ކެންޑިޑޭޓުންނަށް ވޯޓު ދެއްވުމަށް އޭނާ ވަނީ ތަކުރާރުކޮށް ޢިލްތިމާސް ކުރައްވާފަ އެވެ.
މިހަފްލާގައި ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި އެޕާޓީގެ ފަރާތުން ވާދަކުރައްވާ ކެންޑިޑޭޓުން ތައާރަފް ކުރުމާއި ކެންޑިޑެސީ ލިޔުން ހަވާލުކުރެއްވުން އޮތެވެ.
