އަޔާން މުކަރްޖީ ޑައިރެކްޓުކޮށްފައިވާ މި ފިލްމުގައި ރަންބީރުގެ އިތުރުން ދީޕިކާ ޕަދުކޯން ވަނީ މުހިންމު ރޯލެއް ކުޅެފައެވެ. އިންޑިއާ އަދި ރާއްޖެ ގައި ވެސް ގިނަ ބަޔަކު ބަލާފައިވާ މި ފިލްމު ނިމުނު ފަހުން، ފިލްމުގެ މައި ދެ ކެރެކްޓަރުގެ ދިރިއުޅުން ދެން ކުރިއަށްދާނެ ގޮތެއް ބަލަން ގިނަ ބަޔަކު ބޭނުންވެއެވެ.
ނަމަވެސް ފަހުގެ އިންޓަވިއުއެއްގައި ރަންބީރު ވަނީ ފިލްމުގެ ދެވަނަ ބައެއް ހެދުމުގެ އެއްވެސް ވިސްނުމެއް ނެތް ކަމަށް ބުނެފައެވެ. އޭނާ ބުނި ގޮތުގައި ފުރަތަމަ ފިލްމުގެ ވާހަކަ ވަނީ ވަރަށް ފުރިހަމައަށް ނިންމާލެވިފައެވެ. އަދި އެ ވާހަކަ އިތުރަށް ދިގުކުރަން ނުޖެހޭ ކަމަށް އޭނާ ދެކެއެވެ.
ރަންބީރު ފާހަގަކުރި ގޮތުގައި ފިލްމެއްގެ ފުރަތަމަ ބައި އެހާ ކާމިޔާބުވުމުން، ގަދަކަމުން ދެވަނަ ބައެއް ހަދައިފި ނަމަ ފުރަތަމަ ފިލްމުގެ އަސްލު ރީތިކަން ގެއްލުމުގެ ފުރުސަތު ބޮޑެވެ.
މި ފިލްމުގެ ޑައިރެކްޓަރު ވެސް މީގެ ކުރިން ވަނީ ފިލްމުގެ ދެވަނަ ބައެއް ނާންނާނެ ކަމުގެ އިޝާރާތެއް ދީފައެވެ. ރަންބީރުގެ މި ވާހަކަތަކާއެކު ފިލްމުގެ ދެވަނަ ބައެއް އަންނާނެ ކަމަށް އުންމީދުކޮށްގެން ތިބި ސަޕޯޓަރުންނަށް މި ވަނީ މާޔޫސްކަމަކާ ކުރިމަތިލާން ޖެހިފައެވެ. ނަމަވެސް، މި ފިލްމަކީ އަބަދުވެސް ބެލުންތެރިންގެ ހިތްތަކުން ހާއްސަ ޖާގައެއް ހޯދާފައިވާ ފިލްމެއްކަން ޔަގީނެވެ.
