އެސްޓިއޯގެ ކޮމިއުނިކޭޝަން ޑިރެކްޓަރު އަބްދުﷲ މުހައްމަދު ވިދާޅުވީ، ކާޑު ގުދަންތަކާއި އުޅަނދުތައް ޑިސްއިންފެކްޓް ކުރުމަށް ފަހު ކާޑު ގުދަނުގެ ހިދުމަތްތައް މިއަދު މެންދުރު 1:30 ގައި އަލުން ފަށާފައިވާކަމަށެވެ.
އެސްޓީއޯގެ ކާޑު ގުދަނުން ދެމުން އައި ހިދުމަތްތައް މެދުކަނޑާލާފައި ވަނީ އެސްޓީއޯ ކާޑު ގުދަނުގެ ދެ މުވައްޒަފަކު ކޮވިޑް-19 އަށް ޕޮޒިޓިވް ވުމުންނެވެ.
އެހެންނަމަވެސް އެސްޓީއޯ އިން ވަނީ ހެލްތް ޕްރޮޓެކްޝަން އެޖެންސީ (އެޗްޕީއޭ) އާއި އެކު ކާޑު ގުދަނުން މުދާ އުފުލުމުގެ މަސައްކަތް ނުހުއްޓި ކުރިއަށް ގެންދިއުމަށްޓަކައި ކުރަންޖެހޭ ކަންކަމާ ގުޅޭ ގޮތުން މަޝްވަރާކޮށް މި ހިދުމަތް އަލުން ފައްޓާފަ އެވެ.
އެކުންފުނީގެ ކާޑު ގުދަނުން ކޮންމެ ދުވަހަކުވެސް ރާއްޖޭގެ އެކި ހިސާބުތަކުގައި ހުރި ފިހާރަތަކަށް ކާޑުގެ ބާވަތްތައް ފޯރުކޮށްދެމުން ދާއިރު، މިދިޔަ ހަފްތާ އެކަނިވެސް އެކުންފުނން ވަނީ 40،000 ބަސްތާގެ ކާޑު އަތޮޅު ތެރެއަށް ފޮނުވާފަ އެވެ.
އެސްޓީއޯ ސުޕަމާޓް އިން ފޯރުކޮށްދެމުން އައި އީ-ސްޓޯގެ ހިދުމަތް އެ ކުންފުނިން ވަނީ މުދާ އުފުލުމުގައި އުޅުނު މުވައްޒަފަކު ކޮވިޑް-19 އަށް ޕޮޒިޓިވް ވުމުން ވަގުތީ ގޮތުން މެދުކަނޑާލާފަ އެވެ.
އެސްޓީއޯ އިން މިހާރު ވަނީ އެ ކުންފުނީގެ މުވައްޒަފުން މަސައްކަތްކުރާ އެހެން ތަންތަން ވެސް ޑިސްއިންފެކްޓް ކޮށްފަ އެވެ.
