ރާއްޖޭގައި ކާބޯތަކެއްޗާއި ބޭހާ ބެހޭ އިދާރާ އެމްއެފްޑީއޭއިން މިދިޔަ އަންގާރަ ދުވަހު ބުނީ، ހޭންޑީ ވޯޓާ ބޮޓްލިން ޕްލާންޓުން އުފައްދާ ހޭންޑީ ވޯޓާގެ 330 މިލިލީޓަރާއި ބައި ލީޓަރާއި އެއް ލީޓަރުގެ ފެން ބިއްލޫރި ފުޅިތަކުން ފެނިގެން ނުވާނެ ޖަރާސީމުތައް ފެނިފައިވާ ކަމަށެވެ. އެ ފެނުގެ ތަހުލީލު ނަތީޖާ ދައްކާގޮތުން، އެއީ ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯގެ މިންގަނޑަށް ފެތޭ ފެނެއްނޫން ކަމަށް، އެމްއެފްޑީއޭއިން ވަނީ ބުނެފައެވެ
އެހެންކަމުން އެ ފެން ބޭނުން ނުކުރުމަށާއި އެ ފެން ބާޒާރުން ނެގުމަށް ވަނީ އަންގާފައެވެ.
އެމްއެފްޑީއޭގެ އެ ނިންމުމާއި ގުޅިގެން އެކަމާ ގުޅިގެން، ހޭންޑީ ވޯޓާ ބަންދުކުރާ ހޭންޑީ އިންޑަސްޓްރީޒުން ނެރުނު ބަޔާނެއްގައި ބުނީ އެ އޮތޯރިޓީ އެކަން ކުންފުންޏަށް އެންގުމާ އެކު އެއްވެސް ލަސްކުރުމެއް ނެތި އެ ބެޗުތަކުގައި ވިއްކާފައިވާ އެންމެހާ ފުޅިތައް ބާޒާރުން ނަގާފައިވާކަމަށެވެ.
އެ ކުންފުނިން ބުނީ ފެންފުޅިތަކުގައި ޖަރާސީމު ހުރި ސަބަބު ދެނެގަނެ އެކަން ތަކުރާރުވިޔަ ނުދިނުމަށްޓަކައި އަޅަންޖެހޭ ފިޔަވަޅުތައް މިހާރު ވާނީ އަޅާފައިވާ ކަމަށެވެ.
