އެމޭޒަން އަދި އަލީއެކްސްޕްރެސް ފަދަ ބައިނަލްއަގުވާމީ އީ-ކޮމާސް ޕްލެޓްފޯމްތައް ބްލޮކްކޮށްފައިވާ ކަމަށް ސޯޝަލް މީޑިއާގައި ވާހަކަދެކެވެމުން އަންނަތާ ދުވަސްތަކެއް ވެއްޖެ އެވެ.
އެކަމާ ގުޅޭ ގޮތުން ބީއެމްއެލްއިން ރޭ ނެރުނު ބަޔާނެއްގައި އެކަން ވަނީ ދޮގުކޮށްފަ އެެވެ.
ކަސްޓަމަރުންނަށް ބޭނުންވާ ރާއްޖެއިން ބޭރުގެ މުއާމަލާތްތަކަށް އެހީތެރިވާކަން ފާހަގަކުރަމުން ބީއެމްއެލްއިން ބުނީ ކޮންމެ އަހަރަކު ވެސް އެތައް ސަތޭކަ މިލިއަން ޑޮލަރު ކާޑުން ކުރާ މުއާމަލާތްތަކަށް ހަމަޖައްސައިދޭ ކަމަށެވެ.
ބީއެމްއެލް ކާޑުތަކުން ރާއްޖެއިން ބޭރުގެ މުއާމަލާތްކޮށްފައިވާ ގޮތުގެ ތަފާސްހިސާބުތަކަކީ:
2023: 311 މިލިއަން ޑޮލަރު
2024: 389 މިލިއަން ޑޮލަރު
2025: 524 މިލިއަން ޑޮލަރު
2026 ޖަނަވަރީއަށް: 59 މިލިއަން ޑޮލަރު
ބޭންކުން ބުނީ އެ މުއާމަލާތްތަކުގެ ތެރެއިން މިއަހަރު %66 މުއާމަލާތްކޮށްފައި ވަނީ އީކޮމާސް ވެބްސައިޓްތަކުގައި ކަމަށެވެ.
ބީއެމްއެލްއިން ވަނީ، މި މަހުން ފެށިގެން ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތްކުރުމަށް ދޭ ލިމިޓްތައް އިތުރުކޮށްފަ އެވެ. އަދި މިދިޔަ ނޮވެންބަރު މަހުގެ 11 ވަނަ ދުވަހުން ފެށިގެން ބޭންކުން އަންނަނީ ޑެބިޓް ކާޑު މެދުވެރިކޮށް ބޭސްފަރުވާގެ ބޭނުމަށާއި ދަތުރުފަތުރުގެ ބޭނުމަށް ރާއްޖެއިން ބޭރުގެ މުއާމާލާތްތައް ކުރުމަށް މަހަކު 3,000 ޑޮލަރާ ހަމަޔަށް ލިމިޓް ދެމުންނެވެ. އަދި ޑެބިޓް ކާޑުން ރާއްޖޭން ބޭރުގައި ކާޑު މެޝިނުން ކުރާ މުއާމަލާތްތަކަށް މަހަކު 1,000 ޑޮލަރުގެ ލިމިޓެއް ދީފައިވެ އެވެ.
