މިއަދުގެ ސިޔާސީ ހަގީގަތްތަކަށް ބަލާއިރު އިދިކޮޅު އެމްޑީޕީއަށް ދިރުން ގެނައުމަކީ ކުރެވޭނެ ކަމެއް ނޫންކަމަށާއި އެމްޑީޕީގެ ތެރޭގައި މިހާރު ފެކްޝަންތައް އުފެދި އެ ޕާޓީ ބައިބައިވެއްޖެކަމަށް، ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު، ޕީއެންސީގެ ޕީޖީ ލީޑަރު އަދި ޕީއެންސީގެ ކެމްޕޭން މެނޭޖަރު އިބްރާހިމް ފަލާހު ވިދާޅުވެއްޖެ އެވެ.
Advertisement
ތިނަދޫ ސިޓީގެ މާލެ އޭރިއާގެ ޕީއެންސީ ކެމްޕެއިން އޮފީސް ހުޅުވުމަށް ރޭ ބޭއްވި ރަސްމިއްޔާތުގައި ފަލާހު ވިދާޅުވީ 1،352 ގޮނޑީގެ ތެރެއިން 30 އިންސައްތައެއްހާ ގޮނޑިއަށް ވާދަ ނުކުރީ ބަޔަކު ނުލިބިގެން ކަމަށެވެ. މިކަމުން ވެސް އެމްޑީޕީގެ ތާއީދު ދަށަށް ގޮސްފައި އޮތް މަންޒަރު އެނގެން ޖެހޭ ކަމަށް އޭނާ ވިދާޅުވި އެވެ.
"އެމްޑީޕީއަށް މިހާރު ދިމާވެފައިވާ ހާލަތަކީ 2008 ވަނަ އަހަރުން ފެށިގެން މިރާއްޖޭގެ އިޖުތިމާއީ ފޭރާމާއި އިގުތިސާދާއި ރާއްޖޭގެ މުޖުތަމައާއި ދައުލަތަށް ދީފައި ހުރި ގެއްލުންތަކާއި އެބޭފުޅުންގެ ދޮގުތަކުގެ ސަބަބުން އެމްޑީޕީއަށް މިވަނީ މުޅި ރައްޔިތުންގެ ތާއީދު ގެއްލިފައި،" ފަލާހު ވިދާޅުވި އެވެ.
އެމްޑީޕީއަކީ ދައުލަތުގެ ބަޖެޓުން އެންމެ ގިނަ ފައިސާ ލިބޭ އެއް ޕާޓީ ކަމަށާއި، އެ ޕާޓީއަށް މިދިޔަ އަހަރު ނުވަ މިލިއަން ރުފިޔާ ދައުލަތުގެ ބަޖެޓުން ދީފައިވާކަމަށް ފަލާހު ވިދާޅުވި އެވެ.
ނަމަވެސް އިންތިހާބާ ދިމާކޮށް ޕާޓީން ކެންޑިޑޭޓުންގެ ފީވެސް އީސީއަށް އެމްޑީޕީން ދައްކައިދީފައި ނުވާކަމަށް ފަލާހު ވިދާޅުވި އެވެ. އަދި ކެމްޕެއިން ކުރުމަށް އެއްވެސް ހަރަދެއް ކެންޑިޑޭޓުންނަށް ދީފައިނުވާކަމަށް ފަލާހު ވިދާޅުވި އެވެ.
"އަޅުގަނޑުމެންނަށް ފެންނަނީ އިދިކޮޅު އެމްޑީޕީން މޭޔަރު މީގެ ދެދުވަސް ކުރިން ދެކުނިން ޑޯޓުޑޯގައި އުޅުއްވަނިކޮށް. މޭޔަރު ހުންނެވީ ދެ ބޭފުޅުންނާ އެއްކޮށް. ކައިރީގައި ނެތް އެކަކުވެސް. މުޅި އެމްޑީޕީ މިއޮތީ ބައިބައިވެ ފެކްޝަން ހެދިފައި" ފަލާހު ވިދާޅުވި އެވެ.
ފަލާހު ސިފަކުރެއްވި ގޮތުގައި ރާއްޖޭގެ އެކި ކަންކޮޅުތަކަށް ކެންޑިޑޭޓުން ނެރެގެން އެމްޑީޕީން ކުރަމުންދާ މަސައްކަތަކީ ރާއްޖެއަށް ގެއްލުންދީ ގައުމު ހަލާކުކުރުމުގެ މަސައްކަތެވެ.
