މެޓް އޮފީހުގެ ރެކޯޑްތަކުން އެނގޭ ގޮތުގައި، ރާއްޖޭގެ ބައެއް ސަރަހައްދުތަކަށް އިހުސާސްކުރެވޭ ހޫނުމިން މި ހަފުތާގައި ވަނީ 35 ޑިގްރީ ސެލްސިއަސްއަށް ވުރެ މައްޗަށް އަރައިފަ އެވެ.
މެޓުން ބުނީ 1991-2025 އާ ހަމައަށް އެއްކުރެވިފައިވާ ހިސާބުތަކަށް ބަލާއިރު މާޗު މަހު އެވްރެޖްކޮށް ހޫނުމިން އުޅެނީ 30.5 ޑިގްރީ ސެލްސިއަސް އާއި 30.9 ޑިގްރީ ސެލްސިއަސްއާ ދެމެދުގައި ކަމަށެވެ. އެންމެ ދަށްކޮށް ހޫނުމިން ރިކޯޑު ކުރެވިފައި ވަނީ 24.5 ޑިގްރީ ސެލްސިއަސް އާއި 25.8 ޑިގްރީ ސެލްސިއަސް އަށެވެ.
ކުރިއަށް އޮތީ ހޫނުގަދަ އަދި ވާރޭވެހުން މަދު މަހަކަށް ވުން އެކަށީގެންވާތީ، އާންމުން އަދި ހާއްސަކޮށް ދަނޑުވެރިކަމާއި، މަސްވެރިކަމުގެ އިތުރުން ފެނުގެ ވަސީލަތްތައް ބެލެހެއްޓުމުގެ ދާއިރާގައި މަސައްކަތްކުރާ ފަރާތްތަކުން އެކަމަށް ސަމާލުކަންދީ ދުރާލައި ތައްޔާރުވުމަށް މެޓުން ވަނީ އިލްތިމާސްކޮށްފަ އެވެ.
މިހާރު މިއީ އިރުވައި މޫސުމެވެ. ތަފާސްހިސާބުތަކަށް ބަލާއިރު ވެސް އާއްމުކޮށް ރާއްޖެއަށް އެންމެ މަދުން ވިއްސާރަ ކުރަނީ މިދުވަސްކޮޅު އެވެ.
