ޗާގޯސް ޖަޒީރާގެ ރަށްތައް އިނގިރޭސިވިލާތުން މޮރިޝަސްއަށް ހަވާލުކުރަން ނިންމާފައިވާ ނިންމުމާ ރާއްޖެއިން ދެކޮޅު ހަދާކަން ހާމަކޮށް އެކަމާ ދެކޮޅަށް މަސައްކަތް ކުރާތީ އާއި އެ ރަށްތަކުގެ މިލްކުވެރިކަމާ މެދު ދިވެހި ސަރުކާރުން ދައުވާކުރަމުންދާތީ ރާއްޖެއާ ސިޔާސީ ގުޅުން ކަނޑާލަން މިދިޔަ ހުކުރު ދުވަހު މޮރިޝަސްއިން ވަނީ ނިންމާފަ އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ރައީސް މުއިއްޒު ވަނީ މޮރިޝަސްގެ ރައީސް ދަރަމްބީރު ގޮކޫލްއަށް ކުޑައިމީސްކޮށް ވަރަށް ބޮޑަށް ފާޑުވިދާޅުވެފަ އެވެ.
އޭގެ އިތުރުން ރައީސް މުއިއްޒު ވިދާޅުވީ، މޮރިޝަސް އިން ރާއްޖެއާ ގުޅުން ކަނޑާލީ "މަޝްވަރާ ކުރުމެއް ނެތި" ކަމަށެވެ. އަދި ތަކުރާރުތައް މުއިއްޒު ވިދާޅުވީ ޗާގޯސްއަށް ދައުވާ ކުރުމާމެދު ރާއްޖޭގެ ސްޓޭންޑު ދުވަހަކު ވެސް ބަދަލެއް ނުވާނެ ކަމަށެވެ.
ރައީސް ވިދާޅުވީ މިކަމުން ރާއްޖެ އަށް ކުރާނެ ވަކި އަސަރެއް ނެތް ކަމަށާއި ގައުމު ދާނީ މޯލްޑިވްސް ފަސްޓް ޕޮލިސީގެ ދަށުން ކުރިއަށް ކަމަށެވެ.
ޗާގޯސްގެ ރަށްތަކުގެ ހަގީގީ މިލްކުވެރިންނަކީ ދިވެހިންކަން ތާރީހީ ހެކިތަކުން އެނގެން އޮތް ކަމަށް ވިދާޅުވެ އިނގިރޭސި ބޮޑުވަޒީރަށް ރައީސް މުއިއްޒު ވަނީ ސިޓީއެއް ފޮނުއްވާފަ އެވެ. އަދި ރާއްޖެއަށް ޗާގޯސްގެ ރަށްތައް ލިބިއްޖެ ނަމަ، ފޯޅަވަހީގައި އެމެރިކާގެ އަސްކަރީ މަރުކަޒު މިހާރެކޭ ވެސް އެއްގޮތަށް ހިންގުމަށް ފުރުސަތު ދެއްވާނޭ ކަމަށް ރައީސް މުއިއްޒު ވަނީ އެމެރިކާ ސަރުކާރަށް އަންގަވައިފަ އެވެ.
އަދި، ޗާގޯސް ޖަޒީރާތަކުގެ ސިޔާދަތީ ބާރު މޮރިޝަސްއާ ހަވާލުކުރުމަށް އިނގިރޭސިވިލާތުން ނިންމާފައިވާ ނިންމުމަށް ގޮންޖަހައި ގާނޫނީ ފިޔަވަޅު އެޅުމާ މެދު ވިސްނަމުން އަންނަ ކަމަށް ވެސް މި ސަރުކާރުން ވަނީ ބުނެފަ އެވެ.
ރާއްޖެއާ ސިޔާސީ ގުޅުން ކަނޑާލަން މޮރިޝަސްގެ ކެބިނެޓުން ނިންމީ މިދިޔަ މަހުގެ 27 ގަ އެވެ. އެ ގައުމުން ރާއްޖެއާ ސިޔާސީ ގުޅުން ގާއިމުކުރީ 15 ޖެނުއަރީ 1981 ގަ އެވެ.
