ދުނިޔޭގެ އިގްތިސޯދު ދިރާސާކުރާ ފަރާތްތަކާ ހަވާލާދީ ރޮއިޓާސް އިން ވަނީ ތެލުގެ އަގު އުފުލެން ފަށާފައިވާކަމަށާއި އިއްޔެއިން ފެށިގެން ސާފު ނުކުރާ ތެޔޮ ފީފާއެއްގެ އަގު 10 އިންސައްތަ އަށް މަތިވެ 80 އެމެރިކާ ޑޮލަރަށް އަރާފައިވާކަމަށް ބުނެފަ އެވެ.
އިރާނުގެ ޑްރޯން ހަމަލާއެއް އަމާޒުވެ ސައުދީ އަރަމްކޯގެ އެންމެ ބޮޑު އެއް ތެޔޮ ސާފުކުރާ ކާރުހާނާ ކަމަށްވާ ރަސް ޓަނޫރާގެ މަސައްކަތް ވެސް މިއަދު ވަނީ ހުއްޓާލާފަ އެވެ. ރަސް ޓަނޫރާ ކާރުހަނާއަކީ ދުވާލެއްގެ މައްޗަށް 550،000 ފީފާގެ ތެޔޮ ސާފުކުރުމުގެ ގާބިލުކަން ލިބިފައިވާ ކާރުހާނާއެކެވެ. މިއީ ތެޔޮ ސާފުކުރާ ދުނިޔޭގެ އެންމެ ބޮޑެތި ކާރުހާނާތަކުގެ ތެރޭގައި ހިމެނޭ ތަނެކެވެ.
ތެލުގެ އަގު މިހާ ބޮޑަށް އުފުލެން މެދުވެރިވި އެންމެ ބޮޑު ސަބަބަކީ ސްޓްރެއިޓް އޮފް ހޮރުމުޒު މެދުވެރިކޮށް ތެޔޮ އުފުލުމަށް ހުރަސްތަކެއް ކުރިމަތިވުމެވެ. ދުނިޔޭގައި އުފައްދާ ތެލުގެ ގާތްގަނޑަކަށް 20 އިންސައްތަ (ދުވާލަކު 15 މިލިއަން ފީފާ) ދަތުރުކުރަނީ މި ހަނި ސަރަހައްދުންނެވެ.
އިރާނުން ހޮރުމުޒު ކަނޑުއޮޅިން ދަތުރުކުރާ އުޅަނދުތަކަށް ހަމަލާ ދޭން ފަށާފައިވާއިރު ދުނިޔޭގެ ބޮޑެތި ތެޔޮ ސަޕްލަޔަރުން ވަނީ އެ ސަރަހައްދުން ކުރަމުން އަންނަ ދަތުރުތައް ވަގުތީގޮތުން ހުއްޓާލާފަ އެވެ. މިހާރު އެ ކަނޑުއޮޅިން ކުރާ ދަތުރުތައް ހުއްޓިފައިވާއިރު، މި ހަނގުރާމަ އިތުރަށް ދިގުދެމިގެން ގޮއްސިނަމަ ތެލުގެ އަގު އިތުރަށް މައްޗަށް ދާނެ ކަމަށް ތަހުލީލު ކުރާ ފަރާތްތަކުން ބުނެ އެވެ.
އީރާނުގެ މި ހަމަނުޖެހުންތަކުގެ ސަބަބުން ދުނިޔޭގެ މާލީ ބާޒާރުތަކަށް ނުތަނަވަސްކަން އައިސް، ފޮރެކްސް އަދި ހިއްސާގެ ބާޒާރުތައް ބަލިކަށިވެދާނެ ކަމުގެ ބިރު ވެސް ވަނީ ހީވެފަ އެވެ.
