ވ. އަތޮޅު ކައުންސިލުގެ ރައީސް ޝުޖާއު އަލީ އެކްސްގައި މިއަދު ވިދާޅުވި ގޮތުގައި އިދާރީ މުވައްޒަފުންނާއި ކައުންސިލަރުންގެ ތެރެއިން ތިން މެމްބަރަކު މަގާމުން ވަކިވެފައި ވާތީ، ކައުންސިލް އިދާރާއިން ރައްޔިތުންނަށް ދޭންޖެހޭ އެއްވެސް ހިދުމަތެއް ނުދެވޭ ކަމަށެވެ.
އެހެންވެ ރަށުގެ ބަޔަކު ނިކުމެ ކައުންސިލު އިދާރާ ބަންދުކުރީ ކަމަށް އޭނާ ވިދާޅުވި އެވެ. ގާތްގަނޑަކަށް 360 މީހުންގެ އާބާދީއެއް އޮންނަ ރަކީދޫގައި މިހާރު އުޅެމުން ދަނީ 61 މީހުންނެވެ.
މިކަމާ ގުޅިގެން ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި ވިދާޅުވީ އާބާދީ މަދު ރަށްތަކުގައި އިދާރީ މުވައްޒަފުންގެ ދަތިކަން ކުރިމަތިވާ ކަމަށާއި އެ މައްސަލަ ހައްލުކުރުމަށް މަސައްކަތް ކުރަމުން އަންނަ ކަމަށެވެ.
ރަށްރަށުގެ ކައުންސިލްތަކަށް ދިމާވެފައިވާ މައްސަލަތައް ހައްލުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ.
އެގޮތުން، ކައުންސިލްތަކަށް ބޭނުންވާ އިދާރީ މުވައްޒަފުން ހޯދުމުގެ މަސައްކަތްތައް މިހާރު ކުރަމުން އަންނައިރު، ކައުންސިލްތަކަށް ދިމާވެފައިވާ ޖާގައިގެ ދަތިކަން ހައްލުކޮށްދެއްވުމަށް ވެސް ސަރުކާރުން އަންނަނީ ގިނަ މަސައްކަތްތަކެއް ކުރައްވަމުންނެވެ.
