އެމެރިކާ އާއި އިޒްރޭލުން އީނާރަށް މިދިޔަ ހޮނިހިރު ދުވަހު ދޭން ފެށި ވައިގެ ހަމަލާތަކާ ގުޅިގެން ރައްދުގައި އީރާނުން އަންނަނީ އެމެރިކާގެ އަސްކަރީ ބޭސްތައް ހުންނަ އެ ސަރަހައްދުގެ ހުރިހާ ގައުމަކަށް ހަމަލާތައް ދެމުންނެވެ.
އެގޮތުން ގަތަރާއި، ކުވެއިތާއި އޮމާން އާއި ޔޫއޭއީ އާއި އުރުދުންއަށް ވެސް އީރާނުން ވަނީ ވައިގެ ހަމަލާތަކެއް ދީފަ އެވެ. ރާއްޖެ އަންނަ އެމިރޭޓްސް، ފްލައިދުބާއީ، އިއްތިހާދު އަދި ގަތަރު އެއާވޭސްގެ އިތުރުން، ކުވައިތު އެއާވޭސް ފަދަ އެއާލައިންތަކުން ވަނީ ދަތުރުތައް މެދުކަނޑާލައިފަ އެވެ. އެއާ އެކު ގިނަ އަދަދެއްގެ ފަތުރުވެރިން ރާއްޖޭގައި ވެސް ނުފުރި އެބަ ތިއްބެވެ.
ފްލައިދުބާއީން ވަނީ، އެ އެއާލައިނުން އެންމެ އިސްކަމެއް ދެނީ ފަސިންޖަރުންނާއި ކުރޫގެ ރައްކާތެރިކަމަށްކަން ފާހަގަކޮށް، އޮޕަރޭޝަންތައް އަލުން ފެށުމަށް ކަމާ ގުޅުން ހުރި އިދާރާތަކާއެކު މަސައްކަތް ކުރަމުން އަންނަ ކަމަށް ބުނެ ފައެވެ.
ފްލައިޓުތައް މަދުކޮށް، އެމިރޭޓްސް އާއި ފްލައިދުބާއީން މިއަދު ދަތުރުތައް ފެށި ނަމަވެސް، ފްލައިޓްތަކުގެ ހާލަތު ޔަގީންކޮށްފައި ނޫނީ އެއާޕޯޓަށް ނުދާން އިލްތިމާސްކުރި އެވެ. ފްލައިޓްރޭޑާއިން ދައްކާ ގޮތުގައި، ހަަމަލާތައް ފެށި ފަހުން މެދުއިރުމަތިން ކޮންމެ ދުވަހަކަށް 4،000އަށް ވުރެ ގިނަ ފްލައިޓް ކެންސަލްކޮށްފައި ވެއެވެ.
