ބައްސާމް، އަމިން އެވެނިއުގެ ދެ އެޕާޓްމެންޓް ގަތް މުއާމަލާތުގައި އަމީން ކޮންސްޓްރަކްޝަން ކުންފުނިން އޮޅުވާލައި މަނީ ލޯންޑްރިންއަށް އެހީވި ކަމަށް ބުނެ ދައުލަތުން ކުރި ދައުވާ، ސާބިތު ނުވިއެވެ. އެ ކުށުގެ ދަޢުވާ ސާބިތުނުވާކަމަށް ޖަނަވަރީ މަހު ކްރިމިނަލް ކޯޓުން ކުރި ހުކުމް މިހާރު ހައިކޯޓުގައި އިސްތިއުނާފު ކޮށްފައިވާ ކަމަށް އެފްއޭއެމުން ބުންޏެވެ. މި ކޭސްގައި ބައްސާމްގެ މައްޗަށް ކުށް ސާބިތުވެފައިވާއިރު އޭނާވެސްވަނީ އެ މައްސަލަ އިސްތިއުނާފުކޮށްފައެވެ.
އަމީން ކޮންސްޓްރަކްޝަން ކޭސްގައި ޕީޖީ އޮފީހުން ބުނީ އެ މައްސަލަ ސާބިތުކުރުމަށް ދައުލަތުން ހުށަހެޅި ގިނަ ހެކިންގެ ހެކިބަސް ނުނެގުމަށް ކޯޓުން ނިންމާފައި ވަނީ އަދި މައްސަލައިގެ ހެކި ޤަރީނާ ވަޒަންކޮށްފައިވަނީ ޝަރުއީ އަދި ޤާނޫނީ އުސޫލުތަކާ ޚިލާފަށްކަމަށް އެ އޮފީހަށް ފެންނަ ކަމަށެވެ. އެހެންކަމުން ކްރިމިނަލް ކޯޓުގެ ނިންމުން އިސްތިއުނާފުކުރުމަށް މިއަދު ހައިކޯޓަށް ހުށަހަޅާފައިވާ ކަމަށް ޕީޖީން ބުންޏެވެ.
މި އިސްތިއުނާފީ މައްސަލައާއެކު، މަނީ ލޯންޑްރިންގެ ކުށާ ގުޅުންހުރިކަމަށް ތުހުމަތުކުރެވޭ އަމީން ކޮންސްޓްރަކްޝަން ޕްރައިވެޓް ލިމިޓެޑްގެ އަމީން އެވެނިއު އެޕާޓްމަންޓުން އެއްވެސް މުއާމަލާތެއް ކުރުން ހުއްޓުވުމުގެ އަމުރެއް ނެރެދިނުމަށް ވެސް ހައިކޯޓުގައި އެދިފައިވާނެ ކަމަށް އެ އޮފީހުން ބުންޏެވެ.
