ކުށުގެ ވެށީގައި ހަރަކާތްތެރިވާ ގްރޫޕަކީ ގޭންގެއް ކަމަށް ކަނޑައެޅުމަށާއި އެ ގްރޫޕުން ހިންގާ ހުރިހާ ކުޅިވަރު ހަރަކާތްތައް ހުއްޓުވައި އަދި ގްރޫޕަށް ނިސްބަތްވާ މީހުންނަކީ ގޭންގް މެމްބަރުން ކަމަށް ކަނޑައަޅަން ފުރަތަމަ ފަހަރަށް ޕްރޮސެކިއުޓާ ޖެނެރަލްގެ އޮފީހުން (ޕީޖީ) ހައި ކޯޓަށް ހުށަހެޅި މައްސަލައިގެ އަޑު އެހުންތައް ރޭވަނީ އެ ކޯޓުގައި ފަށައިފައެވެ.
އެނގިފައިވާ ގޮތުގައި ރޭ ކުރިއަށް ގެންދިޔަ އަޑުއެހުމުގައި ނިންމީ ޝަރީއަތް އާންމުކޮށް ހުޅުވާ ނުލާ ކުރިއަށް ގެންދާށެވެ.
ތިން ފަނޑިޔާރުންގެ ބެންޗަކުން މި މައްސަލަ ކުރިއަށް ގެންދާއިރު، މައްސަލަ އާއްމުކޮށް ހުޅުވައިނުލާ ކުރިއަށް ގެންދަން ނިންމި ސަބަބެއް ނޭނގެއެވެ. އެކަމަކު ހާއްސަ ހާލަތްތަކެއްގައި ޝަރީއަތުގެ މަޖިލިސް ނުވަތަ މަޖިލީހުގެ ބައެއް އާއްމުކޮށް ހުޅުވާނުލައި ކުރިއަށް ގެންދިއުމުގެ އިހްތިޔާރު ގާނޫނުން ފަނޑިޔާރަށް ލިބިގެންވެއެވެ.
އެގޮތުން ޝަރީޢަތް ސިއްރުކުރެވޭނެ ސަބަބުތަކުގެ ތެރޭގައި އަޚްލާޤީ މިންގަނޑުތައް ހިފެހެއްޓުމާއި، ޤައުމީ ސަލާމަތް ނުވަތަ އަމަންއަމާންކަން ދެމެހެއްޓުމާއި އަދި ޝަރީޢަތް ހުޅުވާލައިގެން ކުރިއަށް ގެންގޮސްފިނަމަ، ޢަދުލު އިންޞާފު ޤާއިމުކުރުމަށް ހުރަސްއެޅިދާނެ ފަދަ ޚާއްޞަ ޙާލަތެއް މެދުވެރިވުން ހިމެނެއެވެ.
ޕީޖީ އޮފީހުން ބުނީ، ސްކޫޕު ގްރޫޕަކީ ގޭންގެއް ކަމަށް ކަނޑައަޅަން ކޯޓަށް ހުށަހަޅަން ނިންމީ ފުލުހުން ހުށަހެޅި ހެކިތައް ދިރާސާކުރުމަށް ފަހުގައި ކަމަށެވެ. އެ ގްރޫޕުގައި ގޭންގެއްގެ ޝަރުތުތައް ފުރިހަމަވާ ކަމަށާއި މިހާރު ވެސް ކުށްކުރުމުގައި ހަރަކާތްތެރިވާ ކަމަށް ޕީޖީ އޮފީހުން ވަނީ ތުހުމަތުކޮށްފައެވެ.
އެ ގްރޫޕަކީ ގޭންގެއް ކަމަށް ކަނޑައަޅައި، އެ ގްރޫޕަށް ނިސްބަތްވާ ކަމަށް ފާހަގަކުރެވުނު ނުވަ މީހަކީ އެ ގްރޫޕުގެ މެންބަރުންގެ ގޮތުގައި ކަނޑައަޅައިދޭން ހައިކޯޓުގައި އެދިފައިވާ ކަމަށް ޕީޖީ އޮފީހުން ބުންޏެވެ. އަދި، އެ ގްރޫޕަށް ނިސްބަތްވާ ކަމަށް ފާހަގަކުރެވިފައިވާ "އެސް ކޭ ޕީ ސްޕޯޓްސް ކްލަބް" ވެސް އުވާލަން ސްޕޯޓްސް ކޮމިޝަނަރަށް އަމުރުކޮށްދެއްވުމަށާއި، "ސްކޫޕު"، "ސްކޫޕު ކަންމަތި" އަދި "އެސްކޭޕީ" ލިޔެފައިވާ ފާރުތަކާއި އެންމެހާ ތަންތަނުން އެ ނަން ފޮހެލަން އައްޑޫ ސިޓީ ކައުންސިލްގެ މައްޗަށް އަމުރުކޮށްދޭން އެދިފައިވާނެ ކަމަށް ޕީޖީ އޮފީހުން ބުންޏެވެ.
