މިދިޔަ މަހުގެ 27 ވަނަ ދުވަހު އެކްސްގައި ކުރެއްވި ޕޯސްޓުގައި އިހްސާން ވިދާޅުވީ އޭނާގެ އަނބިކަނބަލުންނާއި ދިހަ އަހަރުގެ ދަރިފުޅު މަގުމަތިން ދަނިކޮށް އަކުރަމާއި އިބްރާހިމް ވަހީދު ވީޑިއޯކޮށް ވަކި މީހެއް ނޭނގޭ ސޯޝަލް މީޑިއާގެ އެކައުންޓަކުން އެ ވީޑިއޯ އާއްމުކޮށްފައިވާކަމަށެވެ. އެ ޕޯސްޓުގައި ވަނީ އަކުރަމާއި އިބްރާހިމް ވަހީދު މަގުމަތީގައި ތިބެ، ފޯނުން ފޮޓޯއެއް/ ވީޑިއޯއެއް ކުރާ މަންޒަރު ފެންނަ ސީސީޓީވީ ފޫޓޭޖެއް ވެސް އާންމުކޮށްފައެވެ.
އެ ފޫޓޭޖުން ފެންނަ ގޮތުން، މި ވީޑިއޯ ކޮށްފައިވަނީ އިބްރާހިމް ވަހީދެވެ. އަދި އޭނާ އެ ވީޑިއޯ ކުރީ އަކުރަމް އޭނާ އަތަށް ދޭ ފޯނަކުންނެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އިހުސާން ވިދާޅުވީ ހަގީގަތުގައި އެކަން މައްސަލައަކަށްވީ އޭނާގެ 10 އަހަރުގެ ދަރިފުޅުގެ ވީޑިއޯއެއް ނެގުމުން ކަމަށެވެ. އަދި އެމީހުން އެ ވީޑިއޯ ނަގާފައިވަނީ އޭނާ ދިރިއުޅޭ ގޭގެ ކުރިމަތީގައި އެ ގޭގައި ހުރި ކެމެރާއެއްގެ ދަށުގައި ހުރެގެންކަމަށާއި އެ ކެމެރާ ހުރިކަން ވެސް އެބޭފުޅުންނަށް އެނގިވަޑައިނުގަންނަވަނީ ކަމަށް އިހްސާން ވިދާޅުވިއެވެ.
މިނިސްޓަރު ވިދާޅުވީ އެ ދެ މީހުން ވީޑިއޯ ނެގީ އަލީ އިހުސާންގެ ދަރިފުޅު ވެގެން ނޫންކަމަށާއި އެއީ ހޯމް މިނިސްޓަރަކަށް އޭނާ ހުންނަވާތީ، އޭނާއަށް ދޭ ސެކިއުރިޓީއާ ގުޅިގެން، އަދި އެ ސެކިއުރިޓީ އާއިލާއަށް ފޯރުކޮށްދެމުންދާތީ، އެކަމާ ކަންބޮޑުވެގެން ބަޔަކު ފާޅުކުރި ހިޔާލެއް ކަމަށެވެ. އެހެންނަމަވެސް އެކަން ސާފުކުރަން ކަމާއި ގުޅޭ އިދާރާއާ ސުވާކުރަންވީކަމަށާއި އޭގެ ބަދަލުގައި ކުޑަކުދިންނަށް ފުރައްސާރަކުރުމަކީ ޒިންމާދާރުކަމެއް ނޫންކަމަށް އިހްސާން ވިދާޅުވިއެވެ. އަދި ބޮޑެތި ފިރިހެނުން 10 އަހަރު ނުވާ ކުޑަކުއްޖަކަށް ފުރައްްސާރަކުރުމުން އެވާހަކަ ދައްކާނެކަމަށާއި ކުރިޔަށް އޮތްތަނުގައިވެސް ދައްކާނެކަމަށް މިނިސްޓަރު އިހްސާން ވިދާޅުވިއެވެ.
މި މައްސަލާގައި ދައުވާކުރެވޭނެ ކަން ފާހަގަކުރައްވަމުން މިނިސްޓަރު ވިދާޅުވީ އެކަށީގެންވާ މިންވަރަށް ގޭގެ ދެ ކެމެރާއިން ހެކި ހުރި ނަމަވެސް އެކަމުގައި ބަދަލު ހޯދަން ކޯޓަށް ދާން ނުވަތަ ޖިނާއީ މައްސަލައެއްގެ ގޮތުގައި ތަހުގީގުކޮށްދޭން ވެސް އެދިފައި ނުވާނެކަމަށެވެ. އެހެންނަމަވެސް އެދެންޖެހޭ ހާލަތަށް ގޮސްފިނަމަ އެކަންވެސް ކުރައްވާނެ ކަމަށް އިހުސާން ވިދާޅުވިއެވެ.
