ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިނިސްޓަރު އިހްސާން ވިދާޅުވީ ސީރިއާގެ ދެ ސަރަހައްދެއްގައި ތިބި 60 ވަރަކަށް ދިވެހިން ރާއްޖެއަށް ގެނައުމުގެ މަސައްކަތާއި އެހެން ބައެއް ގައުމުތަކުގައި ތާށިވެފައި ތިބި މީހުން ގެނައުމުގެ މަސައްކަތްވެސް ކުރަމުން އަންނަކަމަށެވެ.
މި މަސައްކަތް ކުރަމުން ދަނިކޮށް ރާއްޖޭގެ ތިން ރައްޔިތަކު ތުރުކީއަށް ހިޖުރަކޮށް އެ ތަނުގައި ތާށިވެފައިވާ ކަމުގެ މައުލޫމާތު ލިބުމުން އެމީހުން ހޯދާ ގެނައުމުގެ މަސައްކަތް ފެށިކަމަށްވެސް މިނިސްޓަރު ވިދާޅުވިއެވެ. އެގޮތުން އެ ތިން މީހުންގެ ތެރޭގައި ހިމެނުނު 14 އަހަރުގެ އަންހެން ކުއްޖަކާއި އޭނާގެ މަންމަ މިހާރު ރާއްޖެ ގެެނެސްފައިވާކަމަށް އަލީ އިހްސާން ވިދާޅުވިއެވެ. އަދި މި މީހުން މިހާރު ހިންމަފުށީގައި ހުންނަ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ)ގައި އެމީހުންނަށް ފޯރުކޮށްދޭން ޖެހޭ ކަންކަން ފޯރުކޮށްދެމުން އަންނަކަންވެސް މިނިސްޓަރު އިހްސާން ފާހަގަކުރެއްވިއެވެ.
މި މީހުން ތުރުކީގައި ތިބިކަން އެނގުނީ އެ ގައުމުން މި މީހުން ހިފަހައްޓާ ރާއްޖެއަށް އެންގުމުންކަމަށްވެސް މިނިސްޓަރު އިހްސާން ވިދާޅުވިއެވެ.
ހަނގުރާމަތަކުގައި ބައިވެރިވާން ރާއްޖެއިން ދިޔަ ބައެއް މީހުންނާއި އެފަދަ މީހުން ގެންދިޔަ އާއިލާގެ މީހުން ރާއްޖެ ނާދެވި ހާލުގައި ޖެހިފައި އެބަ ތިބި ކަން މިނިސްޓަރު އިހްސާން ފާހަގަކުރެއްވިއެވެ. އަދި މިފަދަ 23 މީހަކު މީގެ ކުރިން ވެސް ރާއްޖެ ގެނެސް ރިހެބިލިޓޭޓް ވަނީ ކޮށްފައެވެ.
