ނާޒިމް މިހެން ވިދާޅުވެފައި މިވަނީ ޔޫރަފުގައި ނޫނީ ފެންވަރު ރަނގަޅު ބޭސް ނުއުފައްދާކަމަށް ރައީސް މުއިއްޒު ވިދާޅުވެފައިވަނިކޮށެވެ. ރައީސް މުއިއްޒު އޭރު ވިދާޅުވީ އާދައިގެ ބޭސް ގެނައުން ނިމުމަކަށް ގެނެސް، ސީދާ ޔޫރަޕުން ފެންވަރު ރަނގަޅު ބޭސް ގެންނާނެ ކަމަށެވެ. އަދި އެކަން ފަށާފައިވާކަމަށްވެސް ޗައިނާއަށް ކުރެއްވި ރަސްމީ ދަތުރުފުޅަށްފަހު، ވެލާނާ އެއާޕޯޓްގައި ނޫސްވެރިންނާއި ބައްދަލުކުރައްވާ 13 ޖެނުއަރީ 2024ގައި ރައީސް މުއިއްޒު ވިދާޅުވިއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުމެއްގައި ވާހަކަ ދައްކަވަމުން ހެލްތް މިނިސްޓަރު ނާޒިމް ވިދާޅުވީ ފެންވަރު ރަނގަޅުވުން މާނަކުރަނީ 'ޔޫރަޕު ކޮލިޓީ' ވުން ނޫންކަމަށެވެ. އަދި ޔޫރަޕަށް ގެންދާ ގިނަ ބޭހަކީ އިންޑިއާ ނޫނީ ޕާކިސްތާނުގައި އުފައްދާ ބޭސްކަމަށްވެސް ނާޒިމް މިއަދު ވިދާޅުވިއެވެ.
ކޮންމެހެން ޔޫރަޕާއި އޭޝިއާ ޕޯކަސް ކުރުމުގެ ބަދަލުގައި މަސައްކަތް ކުރަނީ ރަނގަޅު ބޭސް ގެނައުމަށްކަމަށް މިނިސްޓަރު ނާޒިމް ވިދާޅުވިއެވެ.
ރާއްޖެއަށް ޔޫރަފުން ބޭސް އެތެރެކުރަން ނިންމި ކަން ސަރުކާރުން އިއުލާންކުރީ މި ވެރިކަމުގެ ކުރީކޮޅުއެވެ. އޭރު ސަރުކާރުން ގެންދިޔައީ ރާއްޖެއަށް އެންމެ ގިނަ މުދާ އެތެރެކުރަމުން ދިޔަ އިންޑިއާއަށް ބަހުގެ ހަމަލާތައް ނުސީދާ ގޮތުން ދެމުންނެވެ. އެގޮތުން ރައީސްް މުއިއްޒުވެސް ވަނީ ރާއްޖެއަށް ޔޫރަޕުން ބޭސް ގެންނަނީ ވަކި ގައުމަކުން ބަރޯސާވެފައި އޮތް އޮތުން ނިމުމަކަށް ގަނައުމަށްކަމަށް ވަނީ ވިދާޅުވެފައެވެ. އަދި ހަނޑޫ ހަކުރު ފުއްވެސް ޔޫރަޕުން ގެންނާނެކަމަށާއި ތަކެއްޗަށް އޯޑަރު ޖަހާފައިވާކަމަށް އޭރު ރައީސްް މުއިއްޒު ވިދާޅުވިއެވެ.
އިންޑިއާއަކީ ރާއްޖެއަށް ކާޑުގެ ބާވަތްތަކާއި އެންމެ ގިނަ އަދަދަކަށް ބޭސް އެތެރެކުރާ ގައުމެވެ.
