ޝީޝާ އާއި ހަކުރުގެ ބާވަތްތައް ހިމެނޭ އެކި އެކި ބުއިންތަކާއި އެނަޖީ ޑްރިންތަކަކީ ގިނަ އަދަދެއްގެ ޒުވާނުން ރާއްޖޭގައި ބޭނުން ކުރަމުން އަންނަ އެއްޗެކެވެ.
ދިވެހި ޑޮކްޓަރުން ހިމެނޭ ޖަމިއްޔާއިން މިދިޔަ އޮކްޓޫބަރު މަހު ނެރުނު ބަޔާނެއްގައި ވަނީ ހަކުރު އެކުލެވޭ ބުއިންތަކާ ޕާމް އޮއިލްއާއި ޓްރާންސް ފެޓް ގިނައިން ހުންނަ ކާބޯތަކެއްޗާއި ޕްރޮސެސްކޮށްފައިވާ މަސް ފަދަ އުފެއްދުންތަކުން ނަގާ ޓެކްސް ބޮޑުކުރަން ގޮވާލައިފައެވެ. އަދި އެކި ފްލޭވާތަކުގެ ދުންފަތް އެކުލެވޭ ބާވަތްތަކާއި ޝީޝާ އެއްކޮށް މަނާކުރަން އެ ޖަމިއްޔާއިން ވަނީ ގޮވާލާފައެވެ.
އެ ޖަމްއިއްޔާގެ ވާހަކަތަކާއި ގުޅުވާ، މިއަދު އޮތް ނޫސްވެރިންގެ ބައްދަލުވުމެެއްގައި ވާހަކަ ދައްކަވަމުން މިނިސްތަރު ނާޒިމް ވިދާޅުވީ މޯލްޑިވިއަން މެޑިކަލް އެސޯސިއޭޝަން (އެމްއެމްއޭ)އިން ގޮވާލައިފައިވާ ގޮތަށް ރާއްޖޭގައި ޝީޝާ މަނާކޮށް، ހަކުރު އެކުލެވޭ ބުއިންތަކުން ޓެކްސް ބޮޑު ކުރަން މަޝްވަރާކުރަމުން އަންނަ ކަމަށެވެ.
މިނިސްޓަރު ނާޒިމް ވިދާޅުވީ ޝީޝާ މަނާކޮށް ހަކުރު އެކުލެވޭ ބުއިންތަކާ ގުޅޭ ގޮތުން ގޮތެއް ނިންމަން އެކަމުގެ މަޝްވަރާތައް ސަރުކާރުން އެކި ފަންތީގައި ކުރަމުން އަންނަ ކަމަށެވެ. އަދި ކަމާ ގުޅޭ ބަދަލެއް ތަންފީޒު ކުރެވޭނީ އެންމެ މުހިންމު ހާލަތުގައި، އެންމެ މުހިންމު ދަނޑިވަޅެއް ބަލައިފައިކަމަށްވެސް މިނިސްޓަރު ނާޒިމް ވިދާޅުވިއެވެ.
