މިދިޔަ އަހަރުވެސް ގިނަ އަދަދެއްގެ ޑޮކްޓަރީ ބޭސް ރަޖިސްޓްރީކުރުމަށް އެ އޮޓޯރިޓީއަށް ވަނީ ހުށައަޅާފަ އެވެ.
މޯލްޑިވްސް ފުޑް އެންޑް ޑްރަގް އޮޓޯރިޓީއިން އާންމުކޮށްފައިވާ ތަފާސްހިސާބުތައް ދައްކާގޮތުން މިދިޔަ އަހަރު މުޅި ޖުމްލަ 594 ބޭސް ވަނީ ރަޖިސްޓްރީކުރުމަށް ހުށައަޅާފަ އެވެ. މީގެތެރެއިން ރަޖިސްޓްރީކޮށްދީފައިވަނީ 363 ބޭހެކެވެ. އަދި 231 ބޭހެއް ރިޖެކްޓް ކުރެވިފައިވާކަމަށް އެ ވުޒާރާގެ ތަފާސްހިސާބުތަކުން ދައްކަ އެވެ.
ޑޮކްޓަރީ ބޭސް ރަޖިސްޓްރީކުރުމުގެ ހުއްދަދޭއިރު ޑޮކްޓަރީ ބޭސް ވިއްކުމުގެ ހުއްދަވެސް އެ އޮޓޯރިޓީން ދަނީ ކުރަމުންނެވެ. އެގޮތުން މުޅިން އަލަށް މާލެ ސަރަހައްދުގައި 33 ފާމަސީއެއް ވަނީ ރަޖިސްޓްރީކޮށްފަ އެވެ. އަދި އަތޮޅުތެރޭގައި 36 ފާމަސީއެއް ރަޖިސްޓްރީކޮށްފައި ވެއެވެ.
އިތުރު ބާވަތްތަކުގެ ބޭސް ރާއްޖޭގައި ވިއްކުމުގެ ހުއްދަ ދިނުމުގެ އިތުރުން، މިދިޔަ އަހަރުގެ ތެރޭގައި އިތުރު 15 ފަރާތަކަށް ރާއްޖެއަށް ބޭސް އެތެރެކުރުމުގެ ހުއްދަވެސް ދޫކޮށްފައިވާ ކަމަށް އެމްއެފްޑީއޭއިން ބުންޏެވެ. އެއާއެކު ރާއްޖެއަށް ބޭސް އެތެރެކުރުމުގެ ހުއްދަ އޮތް ފަރާތްތަކުގެ ޖުމްލަ އަދަދު މިހާރު ވަނީ 63 އަށް އަރާފައެވެ.
އޭގެ އިތުރުން، މިހާތަނަށް ރާއްޖޭގެ އެކި ސަރަހައްދުތަކުގައި އެމްއެފްޑީއޭގެ ހުއްދައާއެކު 445 ބޭސްފިހާރަ ހިންގަމުންދާކަމަށްވެސް އެ އޮތޯރިޓީން ބުންޏެވެ. އޭގެ ތެރޭގައި މިދިޔަ އަހަރު އަލަށް ހުއްދަ ދިން 20 ބޭސްފިހާރައެއް ހިމެނެ އެވެ.
ސަރުކާރުގެ އަމާޒަކީ ބޭހުގެ ރައްކާތެރިކަން ކަށަވަރުކުރުމާއެކު، ރައްޔިތުންނަށް ފަސޭހަކަމާއެކު ބޭސް ލިބޭނެ އިންތިޒާމުތައް ހަމަޖައްސައިދިނުމެވެ. މި މަސައްކަތްތަކަކީ ރައީސް ޑރ. މުޙައްމަދު މުޢިއްޒުގެ ސަރުކާރުން ސިއްހީ ދާއިރާ ހަރުދަނާކުރުމަށް ގެންގުޅުއްވާ ސިޔާސަތުގެ ދަށުން ކުރިއަށްދާ މުހިންމު މަސައްކަތްތަކެއް ކަމަށް ހެލްތު މިނިސްޓްރީން ފާހަގަކުރެ އެވެ.
