ކުރިން އެއްވެސް ވަރަކަށް އިއުލާންކޮށްފައި ނުވާ މި ފެނިލުމާއެކު، ބޮލީވުޑްގެ މަޝްހޫރު "އުދޭ-މަޖްނޫ" ގެ ޖޯޑު އަނެއްކާވެސް އެކުގައި ފެނިގެންދިޔުމުން ސޯޝަލް މީޑިއާގައި ވަނީ ބޮޑު ތަރުހީބެއް ލިބިފައެވެ. މިއީ 2015 ވަނަ އަހަރުގެ "ވެލްކަމް ބެކް" އަށްފަހު މި ދެ ތަރިން އެކުގައި ފިލްމަކުން ފެނުނު ފުރަތަމަ ފަހަރެވެ.
މި ފިލްމުގައި ނާނާ ޕަޓޭކަރް ފެނިގެންދަނީ ނާނާ ވަގްމާރޭ ކިޔާ ބާރުގަދަ ކެރެކްޓަރަކުންނެވެ. ފިލްމުގެ އެންމެ މުހިންމު ވަގުތެއްގައި އޭނާ ފެނިގެންދާއިރު، އަނިލް ކަޕޫރާއެކު އޮތް ގުޅުމުން ބެލުންތެރިންނަށް ކުރީގެ މަޝްހޫރު ފިލްމުތަކުގެ ހަނދާންތައް ވަނީ އާވެފައެވެ. ސޯޝަލް މީޑިއާގައި ގިނަ ބަޔަކު ބުނަމުންދަނީ މިއީ ސިނަމާއެއްގައި ދެއްކި ފިލްމެއް ނަމަ ބެލުންތެރިންގެ ފަރާތުން ބޮޑު އުފާވެރިކަމެއް ފެނިގެންދާނެ މުހިންމު މަންޒަރެއް ކަމަށެވެ.
ސުރޭޝް ޓްރިވޭނީ ޑައިރެކްޓްކޮށްފައިވާ މި ފިލްމުގައި އަނިލް ކަޕޫރު ފެނިގެންދަނީ ރިޓަޔާޑް ސުބޭދާރު މޭޖަރެއްގެ ރޯލުންނެވެ. ފިލްމުގެ ވާހަކަ ބިނާވެފައިވަނީ އޭނާގެ އާއިލާއަށް ދިމާވާ މައްސަލަތަކަކާ ގުޅިގެން ކުރިމަތިލާންޖެހޭ ވަރުގަދަ ހަނގުރާމައެއްގެ މައްޗަށެވެ. މި ފިލްމަށް އާންމުންގެ ބޮޑު ތަރުހީބެއް ލިބެމުންދާއިރު، ނާނާ ޕަޓޭކަރްގެ އާ ސީރީޒް "ސަންކަލްޕް" ގެ ޓްރެއިލާ ވެސް މިހާރު ވަނީ އާންމުކޮށްފައެވެ. އެ ސީރީޒް ރިލީޒްކުރަން ހަމަޖެހިފައިވަނީ މި މަހުގެ 11 ވަނަ ދުވަހުއެވެ.
