މި މަހުގެ 5 ވަނަ ދުވަހު އިންސްޓަގްރާމްގައި ހިއްސާކުރި މި ލިޔުމުގައި، ކާމިޔާބީއަށް ވުރެ ބޮޑަށް އިންސާނަކަށް ވީތީ ދަރިންދެކެ ވާ ލޯބީގެ މުހިންމުކަމުގެ މައްޗަށް އޭނާ ވަނީ އަލިއަޅުވާލާފައެވެ. ރިތިކް ބުނީ ދަރިންނަކީ އެއްވެސް ކަމެއް ހާސިލް ނުކުރިޔަސް، ހަމައެކަނި ދުނިޔޭގައި އުޅޭތީވެސް "ފުރިހަމަ" ބައެއް ކަމަށެވެ.
މި މެސެޖުގައި ރިތިކް ވަނީ އޭނާގެ ދަރިންނަށް ތަފާތު ނަސޭހަތެއް ދީފައެވެ. އެގޮތުން ދިރިއުޅުމުގައި ކާމިޔާބީއާ އެކު، ބޮޑެތި ނާކާމިޔާބީތަކާ ވެސް ކުރިމަތިލުމަށް އޭނާ އެދުނެވެ.
މީގެ ބޭނުމަކީ ކޮންމެ އިހުސާސެއްގެ ފުރިހަމަ ތަޖުރިބާ ދަރިންނަށް ލިބުން ކަމަށް އޭނާ ފާހަގަކުރިއެވެ. މި ލިޔުމަށް ރިތިކްގެ ކުރީގެ އަނބިމީހާ ސުސާން ހާން ވެސް ވަނީ ތައުރީފުކޮށް، ބައްޕައެއްގެ ދައުރާ ބެހޭ ގޮތުން ފޮތެއް ލިޔުމަށް ބުނެފައެވެ.
ރިތިކްގެ ފިލްމީ މަސައްކަތްތަކަށް ބަލާއިރު، އޭނާ އެންމެ ފަހުން ފެނިގެންދިޔައީ "ވޯ 2" އިންނެވެ. މީގެ އިތުރުން، އިންޑިއާގެ އެންމެ މަޝްހޫރު ސުޕަހީރޯ ފްރެންޗައިޒް ކަމަށްވާ "ކްރިޝް 4" ޑައިރެކްޓް ކުރުމުގެ ޒިންމާއާ ރިތިކް ހަވާލުވާން އުޅޭ ކަމުގެ އަޑުތައް ވެސް މިހާރު ވަނީ ފެތުރިފައެވެ. މިއީ އޭނާގެ ބައްޕަ ރާކޭޝް ރޯޝަން ކުރަމުން އައި މަސައްކަތެއް ނަމަވެސް، އާ ފިލްމުގައި ރިތިކް ޑައިރެކްޓަރެއްގެ ގޮތުގައި ފެނުމުގެ ފުރުސަތު ބޮޑެވެ.
