އުމުރުން 90 އަހަރުގެ ސަލީމް ހާން މިދިޔަ ފެބުރުއަރީ މަހުގެ މެދުތެރޭގައި މުމްބާއީގެ ލީލާވަތީ ހޮސްޕިޓަލުގައި އެޑްމިޓްކުރީ ސިކުނޑިއަށް ލޭ ފޭބުމުގެ މައްސަލައެއް ދިމާވެގެންނެވެ. ހޮސްޕިޓަލުގައި ފަރުވާދިނުމަށްފަހު، މިހާރު އޭނާގެ ހާލު ވަރަށް ބޮޑަށް ރަނގަޅުވެ، ވާހަކަދައްކައި ހަދާ ކަމަށް ޖާވިދު އަޚްތަރު ވަނީ ދައުލަތުގެ މީޑިއާ މެދުވެރިކޮށް މިކަން ހާމަކޮށްފައެވެ.
ބައްޕަގެ ބަލިހާލަތާ ގުޅިގެން ސަލްމާން ހާން ވަނީ އޭނާގެ ފިލްމީ މަސައްކަތްތަކަށް ކުޑަ މެދުކެނޑުމެއް ގެނެސްފައެވެ. ނަމަވެސް، ބައްޕަގެ ހާލު ރަނގަޅުވާން ފެށުމާއެކު ސަލްމާން މިހާރު ވަނީ އަލުން މަސައްކަތަށް ނުކުމެފައެވެ. ބައްޕައާ ގާތުގައި ހުރުމަށްޓަކައި، ސަލްމާން އަންނަނީ އޭނާގެ އާ ފިލްމު "ބެޓްލް އޮފް ގަލްވާން" ގެ ޝޫޓިން ހޮސްޕިޓަލާ ކައިރީގައި ހުންނަ މަހްބޫބް ސްޓޫޑިއޯއަށް ބަދަލުކޮށްގެން ކުރިއަށްގެންދަމުންނެވެ. މި ފިލްމުގައި ސަލްމާން ފެނިގެންދާނީ 2020 ވަނަ އަހަރު އިންޑިއާގެ ގަލްވާން ވާދީގައި ހިނގި ކުރިމަތިލުމުގައި ޝަހީދުވި ކާނަލް ބީ ސަންތޯޝް ބާބޫގެ ރޯލުންނެވެ.
ކުރިއަށް އޮތް އަހަރަކީ ސަލްމާން ހާންގެ ފިލްމީ ކެރިއަރުގައި ވަރަށް ތަފާތު އަހަރަކަށް ވާނެއެވެ. "ބެޓްލް އޮފް ގަލްވާން" ގެ އިތުރުން، ސަލްމާން އަންނަނީ ރާޖް އެންޑް ޑީކޭ އާއެކު ސުޕަހީރޯ ކޮމެޑީ ފިލްމެއްގެ މަސައްކަތް ކުރުމަށް ތައްޔާރުވަމުންނެވެ. މި ފިލްމުގައި އޭނާ ފެންނާނީ އާންމުކޮށް ފެންނަ "ބާއީ" ރޯލުތަކާ ތަފާތު، މުސްކުޅިވެފައިވާ ސުޕަހީރޯއެއްގެ ގޮތުގައެވެ. އަދި އޭޕްރީލް މަހުގެ ތެރޭގައި ޑައިރެކްޓަރު ވަމްޝީ ޕައިޑިޕަލީގެ އާ މަޝްރޫއެއްގެ މަސައްކަތް ވެސް ފެށުމަށް ވަނީ ހަމަޖެހިފައެވެ. "ބެޓްލް އޮފް ގަލްވާން" ސިނަމާތަކަށް އަންނާނެ ކަމަށް ބެލެވެނީ 2026 ވަނަ އަހަރުގެ އޮގަސްޓް 15 ގައެވެ.
